BINTULU: Menteri Muda ba Opis Kepala Menteri (Undang Undang enggau Adat Bumiputera) ke mega Kaban Kunsil Nengeri (ADUN) Kakus Datuk John Sikie Tayai ngungkupka bantu dikena meresi enggau ngerataka tanah ba palan rumah panjai baru dikena nganti Rumah Lanting Depong, Nanga Gun Ulu Sungai Arip Selangau ke udah angus pukul 11.25 malam kena 18 Julai nyin tadi.
Nya alai, iya minta Komiti Pemansang enggau Pengelikun Genturung Pendiau (JKKK) Rumah Lanting ngambi ngemaruka profil genturung pendiau lalu nganjung nya ngagai Opis Pelilih Selangau dikena ngemudahka pengawa meri bantu nyengkaum peminta deka ngulihka duit jali rumah ari Perbadanan Pembangunan Perumahan (HDC).
“Mensia mayuh tauka serakup enggau Gerempung Ukai Dikuasa Perintah (NGO) mega dipinta sama mantu peranak (sida ti tasah penusah angus) nya enggau mantu meri gari sereta barang pemakai,” ku iya maya bejalaika pengawa nemuai ngagai rumah panjai 18 pintu nya kena Hari Minggu nyin tadi matau gaya 135 iku sida ti tasah ba penusah angus ngujungka nadai palan endur diau sereta reta tengkira maya ba penusah nya.
Iya madahka, sida ti deka mantu ulih betelefon ngagai Opis Pelilih Selangau, Palan Servis ADUN N60 Kakus tauka terus ngagai JKKK Rumah Lanting. Berebak enggau nya, iya mantaika penyinu ati ngagai sida ke tasah lalu minta peranak kandang menua nya tetap besabar ba atas penusah ke nuntung sida.
“Perintah nengeri amat siru ke sida ti tasah enggau meri mayuh macham bantu nyengkaum nengah Opis Pengintu Pengelantang Raban Bansa (JKM) enggau Opis Pelilih Selangau,” ku iya.
Ba awak ke sama ungkup bantu ke bukai maya penemuai nya, John Sikie udah meri bantu mata duit sepenyampau RM1,000 ungkup 18 pintu rumah panjai nya tauka 18 ketuai ruang bilik dikena meli barang ke guna besesehari.
Sama bisi datai ba pengawa tu iya nya Pemancha Gerosen Jubi, Chairman Ketuai Komuniti enggau Ketuai Kaum (KMKK) Pelilih Tatau Penghulu Sanok Magai, Penghulu Allister Digat, Penghulu Micheal Agul, Kaban Kunsil Pelilih Menua Pesisir Sibu (SRDC) Kunsilor (Kr) Mathew Belawan.
Kelimpah ari nya, Kr Lawrence Lun, Kaban Kunsil Pelilih Dalat enggau Mukah (MDDM) Kr Chuat Glong, Ketuai Indu Parti Pesaka Bumiputera Bersatu (PBB) Kakus Rohana Abdullah, Ketuai Indu Parti Rayat Sarawak (PRS) Kakus Marry Lubon sereta raban komponen Gabungan Parti Sarawak (GPS) PRS enggau PBB Kakus.