KUCHING: Hari besejarah Sarawak, 22 Julai 1963 maya nengeri tu berengkah megai perintah kediri ari perintah British, patut tau diperambu sereta dipasukka dalam bup teks matapelajar Sejarah Sekula Perintah.
Menteri Muda Pekara Korporat enggau Unit Komunikasyen Perintah Sarawak, Abdullah Saidol madah, nya ngambika rebak baru enggau dudi mereti sereta nemu penyelai enggau pengelebih Hari Sarawak, lebih ari ba rayat nengeri tu empu enggau rayat Malaysia.
Iya madahka nengah sejarah Sarawak nya mega, rayat kelebih agi rebak baru enggau dudi ulih meretika pengeran ngetanka hak enggau pekara ti dikemeratka nengeri tu.
“Penyelai enggau pengelebih Hari Sarawak mesti diperetika sereta ditemu tetiap iku anak nengeri Kenyalang, ke deka meretika pasal pengawa ke ditegika kitai ngetanka Hak enggau Pekara ti dikemeratka Nengeri.
“Aku ngarapka sida ti megai tanggungpengawa nyendiaka isi bup teks matapelajar Sejarah ungkup Sekula Perintah mesti ngemasukka pekara ke besejarah kena 22 Julai 1963 Nengeri Sarawak tu, awakka ditemu rebak baru bansa Sarawak kelebih agi enggau rayat Malaysia,” ku iya madah ngagai Utusan Borneo, kemari.
Lebuh ke ngenang pengawa ngintu Hari Sarawak taun tu ti berambaika leka jaku ‘Sarawak Cemerlang’, Abdullah ngarapka rayat ulih ngetanka penyerakup enggau penyulut Sarawak.
“(Taun tu) Ngena rambai jaku ‘Sarawak Cemerlang’, aku ngarapka tetiap iku peranak Sarawak sama megai rambai jaku pengerami tu ngena penegap runding ngetanka penyulut Sarawak, ngambika terus beserakup dalam mayuh bengkah penemu enggau budaya sereta ngembu an pengeran ati nempa penyulut Sarawak ngena chuan kitai empu.
“Rambai jaku tu mega dipejuraika aku nyadi peminta ngagai rebak baru Sarawak, ngambika nempa penyulut nyadi anak bansa bumi Kenyalang ti taluk, liat ati enggau produktif,” ku Kaban Kunsil Nengeri (ADUN) Semop nya.
Nambahka nya, ADUN Layar Gerald Rentap Jabu madah nyerumba ngintu Hari Sarawak ngarapka semua rayat nengeri tu terus begempung sereta beserakup.
Iya ti mega Ketuai Nembiak Parti Pesaka Bumiputera Bersatu (PBB) ngarapka Sarawak ulih terus ngetanka hak tauka kuasa nengeri tu.
“Selamat Ngintu Hari Sarawak. Aku besampi ngarapka semua anak Sarawak begempung sereta beserakup enggau ngetanka hak Sarawak.
“Enti nadai ‘Sarawak IbuPertiwiku’ dini alai identiti kitai?,” ku iya nengah Facebook iya ‘Gerald Rentap Jabu DUN N36 Layar’, kemari.
Kelimpah ari nya, Menteri Pengintu Pengelantang Pendiau Raban Bansa, Orang Indu, Ruang Bilik enggau Pemansang Nembiak Mit, Dato Sri Fatimah nyerumba Hari Sarawak mega ngarapka semua rayat terus bebendar nuju ngagai Sarawak dalam pemaik enggau pengelantang sereta beserakup.
ADUN Dalat nya madahka rayat nengeri tu patut ulih ngurang sereta mutarka penanggul sosial sereta chakah ngangkatka penatai pemisi diri.
“Semua rayat bebendar nuju ngagai Sarawak dalam pemaik enggau pengelantang enggau beserakup.
“Rayat bebendar deka nyungkak penatai pemisi awakka tikas penyeranta ulih dikurangka, penanggul sosial ulih dikurangka kelebih agi bekaul enggau penyalah ngena dadah enggau ‘substance’.
“Kitai tauka rayat Sarawak patut ngurangka penanggul anak ti tinggal ari pelajar sekula kelebih agi anak indu, (kurangka) pekara nirika ruang bilik ba nembiak ke baruh umur, sereta chakah mutarka isu anak nadai surat beranak enggau isu peranak menua sereta nyendiaka infrastuktur ti mungkur raban nyelai pendiau (OKU) enggau orang tuai ngambi ulih dikemanahka agi,” ku iya madah ngagai Utusan Borneo nyerumba Hari Sarawak, kemari.
Kena 22 Julai 1963 sejarah ti besai amat reti ngagai nengeri tu iya nya maya nengeri tu merintah kediri empu nengeri tu, pengudah diserahka perintah British.
Hari Sarawak udah digazet nyadi hari kemisi kenyau ari taun 2016, maya Niang Tok Nan (Pehin Sri Adenan Satem) nyadi Kepala Menteri.
Ba taun 2020, pengawa ngintu Hari Sarawak enggau ti berambaika leka jaku ‘Sarawak Cemerlang’ ke diintu ba Miri diatur nengah chara ‘online’ enggau dipancharka terus nengah TV enggau Facebook.