KUCHING: Projek ngaga Institut Latihan Perindustrian (ILP) Serian ditu dipelaba tembu digaga kena 14 Disember taun 2021.
Menteri Pengatur Pengereja Pengawa Datuk Seri M. Saravanan madahka projek ditampung digaga baru kena 12 Mei tu tadi (2020) diatu udah ngerikod status 12.06 peratus mujur digaga.
Ku iya, projek ti digaga ba tanah ke mungkur pemesai 22.9 hektar nya, laun 19.6 peratus dibandingka perambu ketegal pengawa neritka pentin Atur Nagang Pemindah (PKP) kena 18 Mac tu tadi.
“Bisi penanggul utiliti tiang elekterik ba tengah taba nya ti mesti dipindah ngambika pengawa enggau perintah ngaga kereja dikeluarka ngagai kunteriktor ketegal bisi betukar skop kereja ti ngujungka nya laun digaga.
“Opis Menteri udah ngasuh kunteriktor nusun baru program kereja ungkup pelin mulaika pemanah projek. Kunteriktor nganjung peminta ngelanjarka timpuh (EOT) berindik ari penanggul ke bekaul ke diatu benung diserenih opis menteri,” ku iya.
Iya madah munyi nya kena nyaut tanya Datuk Seri Richard Riot anak Jaem (GPS-Serian) ti minta perintah nerangka status ke pemadu baru bekaul enggau projek ngaga ILP Serian ba Aum Parlimen kemari.
Ku M. Saravanan, projek nya nyengkaum lima blok woksyop latih, begunan opis, begunan buding, begunan kuarters, surau enggau perengkaguna lumba enggau main.
Begunan opis, buding, kuarters, surau enggau perengkaguna lumba enggau main muat endur urung 600 nembiak sekali maya lebuh ke enggau kus ti bisi dibuka dia ila.
Ku iya institut nya institut latih ke-33 ari baruh Opis Pengereja Pengawa.