MIRI: Sekretari Pakatan Harapan (PH) Sarawak, Senator Alan Ling mandangka kereja nyadi raban penyelamat endang besai reti ngagai komuniti.
Berebak enggau nya, iya meransang raban nembiak ngambika milih kereja nya dikena negapka pengereja pengawa enggau servis maya napi penusah ngenyit.
“Aku minta rebak biak kitai nyereta raban bomba nyadika pengawa sida laban bidang tu besai reti sereta begunaka penyereta ti terus dikena nentuka kualiti bomba menua kitai ba tikas ti tinggi,” ku iya nerang.
Ling ke mega Sekretari Parti Tindakan Demokratik (DAP) Sarawak deka komuniti enggau bomba seruran bekerejasama enggau bejalaika tanggungpengawa ke pengelikun enggau servis ti bekualiti.
“Orang gawa perintah enggau komuniti endang enda ulih belengka, semua raban mesti liat ati maya ngatur pengawa enggau sedia mendingka jaku, tu deka ngurangka saru penemu enggau pangan diri lalu ke beguna amat iya nya meri timbal maya dipinta,” ku iya nerang.
Bejaku senentang pemujur Opis Bomba enggau Penyelamat Miri, Ling deka tu nyadi motivasyen sereta peransang ngambika terus meri servis pemadu manah ngagai komuniti.
Kena Hari Lima nyin tadi, ketuai zon enggau tiga ketuai balai bomba ditu seretai nerima Anugerah Perkhidmatan Cemerlang (APC) ba penyulut sida.
Pemujur ti temegah tu nempa sejarah baru ngagai menua enggau opis bomba Miri.
Penerima iya nya Ketuai zon Penerit Adat Kanan Bomba I (PgKB I) Law Poh Kiong, Ketuai Balai Bomba enggau Penyelamat (BBP) Miri Sentral Sapit Penerit Adat Bomba (TPgB) Mohamad Hamdani Madon, Ketuai Balai BBP Lopeng Penulung Kanan Penerit Adat Bomba (PKPgB) Terry Robson Forance Nyanggau enggau Ketuai Balai Marudi Penulung Penerit Adat Bomba (PPgB) Maureen Sim Ah Lian.
“Sida patut nyadika chunto ngagai semua raban bomba enggau mega orang gawa perintah kelebih agi sida ti ba baris mua ngambika semua ngemeranka disiplin ti tinggi sereta kemerah enggau rayat,” ku iya nerang.