KUCHING: Sarawak nyambut manah langgur penemu ari Opis Menteri Pemansang Menua Pesisir (KPLB) deka ngenegapka program nupi kerbau dikena nentu pengawa ngeluarka keju premium ulih dipejalai.
Langgur penemu nya dikenataika Menteri Pemansang Menua Pesisir Datuk Dr Abdul Latif Ahmad maya penemuai ti dipebasa ngagai Sapit Kepala Menteri Datuk Amar Douglas Uggah Embas di opis iya ditu, kemari.
“Perintah nengeri nyambut manah langgur penemu nya sereta kami deka nemu guna opis menteri ungkup program nya.
“Kelimpah enggau nya, kami mega deka bejaku enggau orang ke beranakka puku sereta orang dagang opis menteri laban Sarawak diatu udah bisi palan program nupi kerbau di Limbang enggau urung 5,000 iku chapi,” ku iya.
Ku Uggah nambah baru, Sarawak mega bisi ladang chapi di Darwin Australia nyengkaum urung 2,500 iku kerbau siga.
Ba pun taun tu ku iya, Sarawak mai urung 250 iku chapi ke Limbang deka diberi ngagai orang ke betupi enggau ejensi perintah.
Uggah ke mega Menteri Betanam Betupi Moden , Tanah Adat enggau Pemansang Kandang Menua nambah, langgur penemu nya setipak enggau batang tuju nengeri tu ti deka nguing ngagai pemansang pengawa betanam betupi moden.
Dulu agi ari nya, Latif ba langgur penemu iya madahka menua bisi ngimport urung RM400 juta keju setaun ari menua tasik.
Keju, ku iya perengka ti endang diguna dalam kek tauka nyadika pemakai kena ngirup pagi sereta opis menteri bisi orang ke beranakka puku ari Amerika ti deka ngaul program nya.
“Nyema langgur penemu nya nyadi nyata, Sarawak ulih nyadi pemansut keju 'halal' dalam menua lalu nitihka pakar, keju ke pemadu manah iya nya ari tusu kerbau,” ku iya.
Sama bisi datai Sapit Menteri Pemansang Menua Pesisir Datuk Henry Sum Agong, Menteri Muda Tanah Adat Datuk Roland Sagah enggau Menteri Muda Betanam Betupi Datuk Dr Abdul Rahman Ismail sereta ke bukai.