Anda di sini

Petronas patut ngasika pemutus kort

Advertisement
ROBERT LAU
ROBERT LAU

SIBU: Opis Direktor Petronas patut nitihka pemutus akim enggau chairman nya, Menteri Besai Tan Sri Muhyiddin Yassin, ngambika mayar chukai dagang ngagai Sarawak.

Raban Dewan Negara, Senator Robert Lau madahka diri nangi lebuh iya macha berita bekaul enggau Opis Direktor Petronas kenu ku ngelaban pemutus Muyiddin ngambika mayar chukai dagang Sarawak.

“Aku ngarapka sentimen raban opis munyi ke udah dibantaika tu, enda amat.

“Pengeliat ati Menteri Besai minta Petronas mayar sereta nitihka undang-undang Sarawak, endang pemutus ti engkeman.

“Muhyiddin endang chairman opis kompeni nya empu, lalu raban opis tu enda tau ngelaban pemutus Menteri Besai,” ku iya dalam siti penerang, kilah ensanus.

Nitihku iya, Petronas serekat ba sukut enda ngira ari undang-undang tauka moral, ngambika mayar chukai dagang ti udah ditetapka Perintah Sarawak.

Ku Lau, Sarawak udah bulih hak ke patut ari Petronas ba senentang chukai dagang tu lalu sida (Petronas) patut nitihka pemutus kort.

“Petronas patut nitihka undang-undang Sarawak lebuh beoperasyen di nengeri tu laban ba nengeri bukai, Petronas mega beoperasyen sereta mesti nitihka undang-undang ba sesebengkah nengeri nya, lalu baka nya mega sida patut nitihka undang-undang nengeri tu,” ku iya.

Ari sukut moral ku Lau, Petronas patut beterima kasih ngagai asil untung ti udah dipenggi sida ari kandang tebing tasik Sarawak, pengelama setengah abad ke udah.

“Siti ari semaya ke besai ti udah digaga bala ketuai Tanah Melayu ngagai peranak Sarawak, ngambika enggau ba pengawa numbuhka menua Malaysia ba taun 1963 suba iya nya, Sarawak deka lengkas lalu seriris enggau Semenanjung Malaysia ari sukut pemansang.

“Tu mih semaya ti udah digaga apai penumbuh menua kitai dikena narit Sarawak (enggau Borneo Utara) ngambika enggau pengawa numbuhka menua Malaysia. Rayat Sarawak semina minta nama ti udah disemaya sida lalu nerima kaul ti bela sereta enda beragih,” ku Lau.

Ku penemu iya, mayuh untung ti udah diempu Petronas lalu deka majak diambi ari Sarawak.

Ku iya nambah, udah kelalu lama asil minyak enggau gis ti udah diambi Petronas ari kandang tasik Sarawak dikena ngemansangka Semenanjung Malaysia nyentuk ke Sarawak diseliahka.

“Projek besai baka Menara Besapit Petronas enggau Putrajaya dipelanja ngena asil duit tu.

“Petronas mayar dividen ninting taun dalam penyampau bepuluh bilion ngagai perintah besai, sekumbang timpuh berapa dekad ngelama tu,” ku iya.

Dalam taun tu ku Lau, Petronas mayar RM24 bilion ngagai Perintah Besai, lalu bisi diripot sereta dipelabaka mayar mayuh agi dividen taun tu.

“Kena taun nyin kemari, Petronas udah mayar dividen RM54 bilion ngagai Perintah Besai,” ku iya nambah.