KUCHING: Peranak Samarahan nyambut manah projek ngangkatmanah Jalai Datuk Mohd Musa kena mutarka penanggul jalai sekut ti kelalu balat ba semanjai jalai nya.
Chairman Majlis Perbandaran Kota Samarahan (MPKS), Datuk Peter Minos madahka maya jam bekereja, jalai nya sekut amat lalu lebih ari 70,000 iku penguna ti nengah jalai nya ninting hari.
Jalai tu ku iya ditengah sida ke ari Serian, Bratok, Tapah enggau Kota Sentosa pulai mansang ngagai mengeri Kuching nengah Kota Samarahan.
“Kenyau aku nyadi chairman MPKS ba taun 2016, aku dipadahka abis nadai bisi 10 kali penusah bebadi nyadi ti nabanka nyawa ba jalai alun tu lalu tu endang ngenyinuka ati.
“Nya alai kami ba Samarahan nyengkaum penguna ari kandang endur ke bukai amat gaga ati pengudah atur dipejalaika kena mutarka penanggul penyekut trafik ditu,” ku iya madah ngagai Utusan Borneo.
Ku Minos nambah, Menteri Kanan Infrastruktur Datuk Seri Fadillah Yusof ke mega Menteri Kereja Raya udah ngemujurka pengawa nasih tanah ungkup kereja ngangkatmanah jalai nya kena Hari Enam nyin tadi.
Kereja ngangkatmanah jalai sepemanjai 11.6 kilometer nya beungkus RM180 juta berengkah ari Batu 8 1/2 nyentuk ngagai ‘roundabout’ Jalai Datuk Mohd Musa.
“Pengudah dua ngagai setaun ari diatu, kitai deka meda api trafik ba tiga ‘roundabout’ di Samarahan enggau Jalai Datuk Mohd Musa ti baru diangkatmanah.
“Tu tentu deka meri pengelantang enggau kami beterima kasih ngagai perintah Perikatan Nasional (PN) enggau perintah Gabungan Parti Sarawak (GPS) ti ngidupka baru projek nya,” ku iya.