Anda di sini

Geran MRP tau dikena ngangkatka tikas sosio-ekonomi rayat, ku Sikie

Advertisement
John Sikie (tiga kiba) nyuaka geran MRP ngagai Pemancha Gerosen.
AGIH BELANJA:John Sikie (tiga kiba) nyuaka geran MRP ngagai Pemancha Gerosen.

BINTULU: Geran Projek Mit Menua Pesisir (MRP) ke diberi ngagai raban ti ngarika komuniti ulih diguna ke tuju dikena ngangkatka sosio-ekonomi kelebih agi dalam sektor betanam betupi nyengkaum dikena ngemanahka rumah panjai.

Menteri Muda di Opis Kepala Menteri (Undang-Undang enggau Adat Bumiputera) Datuk John Sikie Tayai madah, entara penguntung ke ulih diguna nengah geran iya nya ulih meli paung sawit enggau paung buah ngambika dikemansang dikena mantu ngangkatka tikas ekonomi komuniti.

Kelimpah ari nya, ku iya, kereja nyeruri rumah enggau meli perengka berumah ungkup nirika rumah panjai mega ulih ngena geran ti diterima nya.

Taja pia ku iya, chairman Komiti Pemansang enggau Pengelikun Genturung Pendiau (JKKK) patut madah sereta ngatur aum begulai enggau peranak rumah panjai diri empu sentang agih belanja MRP ti diterima nya.

“Sida ulih ngatur aum begulai bakani chara ti engkeman dikena melanja geran MRP nya,” Ku Kaban Kunsil Nengeri (ADUN) Kakus nya maya nyuaka geran MRP Kunsil Nengeri (DUN) N60 Kakus ngagai 45 penerima ti ngaul gerempung, Gerempung Ukai Dikuasa Perintah (NGO) sereta JKKK rumah panjai sepenyampau RM618,775 ba Bilik Aum Opis Pelilih Tatau kemari.

Pengawa ngagihka geran MRP tu dibagi ngagai dua renggat enggau tetiap renggat khas ungkup 20 iku penerima begintir nitihka atur Prosedur Operasyen Standard (SOP) Atur Nagang Pemindah Nitihka Penetap (PKPB).

Berebak enggau nya, pengawa milih tauka nyiri pangku pengawa dalam JKKK enda patut ngagai sida ti dalam sebuah ruang bilik aja tang pangku pengawa nya patut milih peranak bukai ti bisi pematut ngambika atur dalam komiti lurus agi sereta enda bechiping.

Iya mega ngelalau peranak ngambika enda ngatur aktiviti ngabang sereta begempuru bebala mayuh maya ngintu Hari Gawai ila, sereta ngintu pengerami nya enggau diri sebilik ke semak aja lalu mengkang diau di rumah kena mutuska rentayan pengelekai COVID-19.

“Komuniti patut nitihka SOP PKPB entara nya baka seruran ngemeranka seraka sosial, ngena penuchi jari, suah masu jari sereta ngena sengkabung idung enggau mulut.

“Pia mega, peranak ti diau di mengeri enda dikemendar pulai ke menua enggau rumah panjai berami ngintu Gawai, laban apai indai di menua entara orang ti lunggar umur bisi risiko enti dirampit lalu kitai patut bekerejasama nyeliahka pengelekai virus COVID-19 tu,” ku iya.

John Sikie beterima kasih ngagai semua pekereja ti bekerejasama dalam pengawa ngagihka pemakai ngagai peranak di DUN Kakus maya timpuh PKP nyengkaum bantu ari semua ejensi perintah ti ngaul Opis Pelilih Tatau, Selangau enggau Mukah, Opis Bomba enggau Penyelamat, Kaunsil Pemansang Bintulu (BDA), Opis Pengintu Pengelantang Raban Bansa (JKM), Palan Servis Komuniti DUN N60 Kakus, NGO enggau Ketuai Komuniti sereta Ketuai Kaum (KMKK) Pelilih Tatau.

“Meri pengaga ati mega ngagai pekereja rintai mua ti mungkur raban Polis Diraja Malaysia (PDRM), Opis Volunteer Malaysia (RELA), Raban Soldadu (ATM) enggau Opis Menteri Pengerai Malaysia (KKM) ti gawa enda ngira maya kena nentuka COVID-19 ulih dipunaska,” ku iya.

Sama bisi datai ba pengawa tu iya nya Pemesai Pelilih Tatau Barayan Lenya, pemesai Pelilih Selangau Inting Nyami, Inspektor Nyipa Juwet ti ngarika Ketuai Polis Pelilih Tatau, Pemancha Gerosen Jubin, Penghulu Thomas Jawa Lasu.