KUCHING: Bisto udah dikemendarka beoperasyen dalam timpuh Atur Nagang Pemindah Bisi Penetap (PKPB).
Sapit Kepala Menteri, Datuk Amar Douglas Uggah Embas madah, taja pia Bistro nya semina dikemendarka nyendiaka servis pemakai enggau ai irup aja.
“Komiti Mutarka Penusah Ngenyit Nengeri Sarawak (JPBN) udah ngaga pemutus, ke alai operasyen Bistro dikemendarka tang enda dikemendarka nyendiaka servis pemerindang baka karaoke enggau ‘live band’.
“(Bistro) semina dikemendarka nyual barang pemakai aja,” ku iya ti mega Chairman JPBN ba aum pengarang berita ba Begunan DUN Lama ditu, kemari.
Kelimpah ari nya, Uggah madah komiti mega udah ngaga pemutus. iya nya rayat Sarawak ke datai ari menua luar ti transit ba KLIA tauka Padang Bilun Antarabansa Kota Kinabalu enda ibuh minta permit ari Polis.
“Tang sida patut minta tama ke nengeri Sarawak ngagai JPBN nengah ‘online’ sereta deka dikuarantin pengelama 14 hari,” ku iya.
Berebak enggau tu ku iya, komiti dipadahka bisi urung 3,742 iku orang udah meli tiket pulai ke Kuching.
Iya madahka raban nya mega deka nitihka prosedur operasyen standard (SOP) ke udah ditetapka, dalam timpuh Atur Nagang Pemindah Bisi Penetap (PKPB) baka kuarantin 14 hari.
“Pagi tadi (kemari) kitai dipadahka bisi 3,742 iku udah meli tiket bilun pulai ke Kuching.
“Enti sekeda bisi nanya sekalika kitai nerima penatai sida tu tauka enda? Kitai deka nerima sida tang patut nitihka atur kuarantin enggau ke bukai,” ku iya.
Kelimpah ari nya Uggah lebuh ti ngenang pasal SOP maya bebeli barang, iya madahka bisi sekeda orang ti nadai pengirau sereta nyata ngelanggar SOP ti ditetapka ba palan bebeli barang, kedai runchit enggau ke bukai.
Iya madahka Opis Menteri Kaunsil Kandang Menua enggau Pengawa Berumah, bisi ngeluarka SOP kedai runchit ti nyadi garis lalau semua pengemeran, orang dagang enggau pengempu dagang ke udah dikemendarka beoperasyen.
Sekeda ari garis lalau dalam SOP baka ngenukuka seraka sosial, natak penyampau orang ke tama enggau pansut ari premis , nentuka semua staf, pemekal enggau penguna diperesa pengangat tubuh sebedau tama premis, nyendiaka ‘hand sanitizer’ ba pintu penama, pekereja patut ngena sengkabung idung enggau mulut enggau bejalaika proses meresi igi penyakit sekumbang timpuh beoperasyen.
“Ke pengelikun enggau pengerai, enti tau mai pen kediri empu dikena nulis nama, lumur kad pengelala enggau lumur telefon sebedau tama ke dalam kedai,” ku iya.