MIRI: Urung 1,000 bantu pemakai ti dibungkus lalu dipasuk ke dalam guni udah datai enggau likun ba rumah panjai ba sitak Telang Usan.
Kaban Kunsil Nengeri (ADUN) Telang Usan Dennis Ngau madah semua bantu pemakai nya dianjung ngena servis bilun engkabang Tentera Udara Diraja Malaysia (TUDM).
“Taja atur jam penerebai bilun ungkup servis nganjung bantu pemakai nya endang serekat, tang semua bantu nya udah mujur dianjung enggau kerejasama raban volunteer sereta ejensi perintah,” ku iya madah ke Utusan Borneo kemari.
Nitih ku iya, semua raban ti bekereja ba baris mua nyengkaum raban volunteer udah nganti ba padang bilun Miri kenyau ari pukul 6.30 pagi dikena sereta mungkus pemakai.
Dennis mega beterima kasih ngagai raban TUDM, pemesai soldadu, raban volunteer sereta ketuai komuniti ti sama bisi datai udah ngemujurka program nganjung bekal bantu pemakai nya.
Entara ke bisi datai Kaban Parlimen (MP) Baram Anyie Ngau, Kunsilor Simpson Njock Lenjau, Sekretari Politik Kepala Menteri Charles Balan, Penghulu Anthony Kule enggau mayuh agi bala bukai.
“Kitai mega beterima kasih enggau kerejasama lebih 30 raban volunteer ti udah sama nyusun, ngira enggau mungkus pemakai sebedau nya dianjung ngena bilun engkabang ke Ulu Tinjar enggau Ulu Baram,” ku iya.
Dennis madah bantu pemakai nya lalu diteruska pagi kemari dikena nentuka semua genturung pendiau enggau rumah panjai di sitak iya enda tinggal.
“Ungkup peranak ti bedau nerima bantu pemakai, kitai ngarapka sida terus besabar laban bekal pemakai nya deka dianjung berenggat,” ku iya nerang.