SIBU: Gerempung Bansa Dayak Sarawak (SDNU) Sibu enggau Sarakup Indu Dayak Sarawak (SIDS) Sibu udah bebendar meri bantu pemakai pengelama lapan hari bejurut ngagai raban bansa Dayak ba kandang mengeri tu, ti napi tating penusah ketegal Atur Nagang Pemindah (PKP).
Chairman SDNU Sibu Chambai Lindong madah, sebaka ba kandang mengeri ke bukai di Sarawak, mayuh mega peranak ba kandang menua Sibu ditu kelebih agi komuniti Dayak napi penusah sekumbang timpuh atur PKP tu.
“Mayuh ari raban sida tu endang datai ari rumah panjai enggau menua pesisir, ke bekereja ba mengeri tu ba bemacham sektor baka pekereja ti begaji hari.
“Sida enggau diri sebilik nya diau ba kuarters endur bekuli, rumah suwa enggau bilik suwa ba begunan rumah atas kedai (ringkat 1&2) di mengeri tu,” ku iya madah ngagai pengarang berita.
Berindik ari PKP tu ku iya, raban tu (orang ke begaji hari) napi pemar ari sukut belanja laban lenyau batang pengawa enggau pun penatai pemisi.
Ku Chambai, tang nasit manah laban mayuh raban ke gerah jari udah mantaika diri sereta meri bantu bekal pemakai tauka duit belanja dikena meli barang dapur ke diagih ngagai sida ti amat begunaka bantu nya.
“Dalam timpuh lapan hari empai lama, SDNU Sibu enggau SIDS Sibu endang kiruh mantu sida ke napi penusah kurang bekal pemakai dalam timpuh PKP tu.
“Kami bisi numbuhka siti organisasyen (palan operasyen) nengah ‘online’ enggi kami empu, dikena ngumpul, nerima enggau meri informasyen bekaul enggau peminta ungkup barang pemakai ke diatur nengah rentayan komiti kami.
“Kami mega numbuhka tiga tim kena mantu ngagihka bantu tu, ke dikemata Opis Residen Sibu enggau Opis Pelilih Menua Sibu,” ku iya nambah.
Berebak enggau nya ku Chambai, taja pan barang pemakai ke diagih raban iya apin chukup, tang program bantu pemakai ari perintah diatu udah bisi sereta udah diberi.