KUCHING: Media patut diberi insentif laban udah bejalaika pengawa ngajar sereta terus meri pemadah ke pemadu baru ngagai komuniti sentang COVID-19, pia ku presiden Gerempung Perubat Malaysia (MAA), Dr N Ganabaskaran.
Lebuh mantaika langgur penemu nya kemari, iya madahka MAA meri terima kasih ngagai media laban udah bejalaika pengawa ti beguna amat mantu ngiring sereta nentuka menua tu bisi penerang ke chukup sentang pandemik COVID-19.
“Media menua kitai udah nyendiaka kami pemadah ke silik sentang gaya COVID-19 di menua.
“Terima kasih ngagai penyakah sida ngereja pengawa, tetiap iku di menua tu deka terus dipadah enggau penerang ke pemadu baru,” ku iya ba penerang berita kemari.
Dr Ganabaskaran mega madahka media udah bejalaika pengawa ke beguna amat ngambika pengawa nagang enggau atur ke manah agi dipejalaika ba kandang endur ke bisi dirampit.
Nya alai, iya ngasaika perintah patut meri orang ke gawa ba media insentif khas ke pengawa sida ti chukup manah sekumbang maya krisis tu.
“Baka bala pengereja pengawa nyaga pengerai kami, sida mega ngelaban pandemik tu ke menua nengah nyendiaka mensia mayuh semua pemadah ke diguna sida.
“Nya kebuah mensia mayuh patut endar suah meresa sereta ngemaruka penerang sida nengah media sentang penerang ke pemadu baru nyauka tetiap jam sentang gaya COVID-19 di menua tu,” ku iya.