SRI AMAN: Bisi 137 Ketuai Ruang Bilik (KIR) ari 10 buah rumah panjai ba sitak Paku Undop lalu bisi 471 KIR ari 24 buah rumah panjai ba sitak Batu Lintang nerima bantu bekal pemakai ari Menteri Pengelantang Komuniti Sarawak, Datuk Francis Harden Hollis ba dua palan bebida bepalan di Dewan Komuniti Ulu Paku enggau Dewan Mayuhguna Sekula Primari (SK) Batu Lintang, Undop, Sri Aman ditu kemari.
Harden ke mega Kaban Kunsil Nengeri (ADUN) Simanggang madah, berindik ari nemu sentang penusah ti ditapi rayat dalam timpuh Atur Nagang Pemindah (PKP) tu, perintah udah ngemendarka bantu pemakai ngagai rayat ti tekeruga.
“Taja enda chukup tang pemendar perintah deka mantu rayat nya endang chukup manah sereta seruran nemu ke guna rayat,” ku iya maya pengerami mit beserimbai Pengawa Nyadung Bantu Pemakai Dalam Timpuh PKP COVID-19 di Dewan Mayuhguna Sekula Primari (SK) Batu Lintang, Undop, Sri Aman ditu.
Ku iya, atur nyadung bantu pemakai nengah Palan Servis Komuniti tu ungkup renggat keterubah lebih ngagai kandang menua pesisir dulu lalu ba kandang endur bukai deka diberi berenggat.
“Semua rayat deka nerima bantu tu enggau raban kami benung bebendar deka meri bantu pemakai tu berenggat ke alai diatu kami ngemeratka dulu meri bantu pemakai renggat keterubah ba kandang menua pesisir,” ku iya.
Berebak enggau nya, Harden meri terima kasih ngagai kerejasama ti manah ari ejensi ke bekaul dalam ngemujurka proses ngagihka bantu pemakai ari Opis Pengelantang Pendiau Raban Bansa Bagi Menua Sri Aman, Polis Diraja Malaysia (PDRM), Angkatan Pertahanan Awam Sri Aman enggau RELA Sri Aman ti udah mayuh mantu dalam proses nyadung bantu tu.
Dulu agi ari tu, pengawa meri bantu pemakai nya udah disuaka Harden empu ngagai komuniti ke bekaul.
Sama bisi datai ba pengawa tu, Sapit Residen Bagi Menua Sri Aman, Elvis Didit enggau Pemesai Pengelantang Pendiau Raban Bansa Bagi Menua Sri Aman, Vivian Engkiong.