MIRI: Orang dagang Miri nyambut manah Pakej Bantu Khas (PBK) Sarawakku Sayang ti dipeda meri pengelantang sereta ngurangka tating orang bedaja, orang dagang mit sereta komuniti dagang ke bukai.
Ketuai Pemadah Dewan Usahawan Bumiputera Sarawak Miri, Mohd Hafidz Rohani madahka maya tu mayuh orang dagang lenyau pun penatai pemisi pengudah Atur Nagang Pemindah (PKP) dipejalaika.
“Ungkup orang bejual tauka orang dagang ti nyuwa premis kedai, ngaji pekereja sereta mayar suwa meli ke bukai udah tentu tekeruga enggau PKP.
“Nyema gaya tu majak nyadi, lalu dipelaba mayuh orang bejual tengkerap laban nadai pemansut penatai pemisi,” ku iya madah ngagai Utusan Borneo.
Berebak enggau nya, bantu khas ti dibantaika Kepala Menteri Datuk Patinggi Abang Johari Tun Openg meri penampak baru ngagai komuniti dagang.
“Ba aku, bantu khas tu dipeda engkeman sereta mekuh dalam mantu komuniti dagang ngambika orang bedaja, pedagang mit sereta komuniti dagang ulih nampung pengidup tauka 'survival' dalam pengawa dagang sida empu,” ku iya nerang.
Ketuai Dewan Raban Biak nya mega beterima kasih jaku ti dibantaika Abang Johari ti nangguhka mayar duit jali pengelama semilan bulan ngagai Pemansang Dagang Mit enggau Jelan Pemesai (PKS) diteritka bulan April tu ila.
“Diskaun utiliti entara 5 ngagai 15 peratus, ungkup industri sereta 25 peratus ungkup domestik pengelama 6 bulan ulih ngelimatka kami nyentuk RM500 sebulan,” ku iya.
Nitih ku iya, semua raban sekalika ari pengaji, pekereja enggau mensia mayuh sereta campur tangan perintah mesti bejalaika tanggungpengawa dalam proses ngenegapka ekonomi.
“Tanggungpengawa pengaji ari PKS mesti dikemeratka laban PKS tulang belakang ti nyungkak penatai pemisi sereta ekonomi menua.
“Nyema tu lemi enggau pengawa dagang ti deka ditutup sereta mayuh orang lenyau kereja sereta ba pengujung nya tu ulih ngeruga ekonomi,” ku iya nerang.
Berebak enggau nya bantu khas sekalika dibantaika perintah besai enggau perintah nengeri dalam mantu PKS negapka baru ekonomi endang meri pengelantang ngagai pengemeran industri.