KUCHING: Ketuai Pemadah Parti Pesaka Bumiputera Bersatu (PBB) Datuk Idris Buang deka Pekara 16 Konstituensyen Sarawak diubah ngambika enda ngemendarka orang ke ukai peranak Sarawak enda bediri minta pilih ba Pengawa Bepilih Nengeri (PRN).
Ketuai Pemadah Parti Pesaka Bumiputera Bersatu (PBB) Datuk Idris Buang deka ke pekara nya laban ku iya, langgur nya ukai reti nangika sesapa orang luar Sarawak bediri minta pilih ngerebut kerusi Kunsil Nengeri (DUN) tambah mega iya ngasaika nya endang patut dipejalai seriris enggau gaya politik Sarawak ke diatu.
“Tang pekara ti pemadu beguna amat iya nya kitai nyaga Sarawak ari ‘virus’ budaya politik ti kamah sereta nadai meri penyenang laban dipelaba nya tau ngeruga semua,” ku iya nengah siti penerang, kemari.
Iya ngenang sentang jaku dalam media rama ba bala ‘warganet’ ti meri langgur penemu ke alai barang bagi peranak Malaysia sekalika individu nya asal ari luar Sarawak, patut enda dikemendarka bediri minta pilih.
Idris mega madah, ari baruh Pekara 16 Konstistuensyen Sarawak madahka:
“Tetiap peranak ti beumur tauka lebih 21 taun ti diau mendam di nengeri tu tau dipilih nyadi Kaban Kunsil Nengeri (DUN), semadi mih enti iya dikinsil ba pematut nyadi kaban ari Konstituensyen Perintah Besai tauka Konstituensyen tu tauka ari barang bagi undang-undang baka ti udah disebut ba Pekara 17.”
Ku iya, bisi mayuh macham reti ‘peranak mendam’ ti tau ditemu dalam sekeda diksionari Inggeris enggau diksionari undang-undang, tang nadai timpuh minimun tauka timpuh ditetap ungkup timpuh diau tauka sesiku ke diau mendam nya.
“Ulih diperati penerang pasal ‘peranak mendam’ ari baruh Pekara 16 Konstituensyen Sarawak kitai diatu majak lunggar ari sukut reti laban nya dipelaba nyengkaum sida ti kala diau ba nengeri tu taja ba timpuh pandak sekalika sebulan tauka setaun.
“Aku ngemaruhka diri ngansak bala ketuai perintah ari baruh Gabungan Parti Sarawak (GPS) ngambika berundingka ubah rang undang-undang tu maya aum Kunsil Nengeri pengudah tu ila,” ku iya nyemetak.