SIBU: Penyanding Penemu Parti Sa’Ati Rakyat Sarawak (SUPP) Dudong Datuk Dr Soon Choon Teck ngansak bala pengundi meri sukung penuh ngagai Wong Ching Yong nyadi chalun ari Gabungan Parti Sarawak (GPS) ba Pengawa Bepilih Nengeri (PRN) ti deka datai.
Berindik ari tu, Dr Soon madahka diri andalka Wong ke mega Chairman SUPP Pampang Dudong ulih mai pemansang ngagai pelilih Dudong enti sema iya mujur menang ba kerusi nya.
“Aku ngarapka bala pengundi meri peluang ngagai iya ngambika ulih bekereja sereta meri servis ke rayat lalu ngemansangka sitak Dudong.
“Nyadi, sama bela mih kitai meri sukung enggau kerejasama ngagai iya ngambika ulih ngembing sereta megai sitak Dudong tu pengelama lima taun ti deka datai,” ku jaku lalau Wong.
Iya bejaku munyi nya lebuh ti enggau ngulu Program Nyambut Taun Baru China 2020 enggau Hari Pengada iya ba sebuah hotel ke tebilang di Sibu ditu, kilah lemai ensana.
Nitihku Dr Soon, PRN Sarawak nyau majak semak lalu semua raban patut bekerejasama berengkah ari diatu ngambika chalun GPS teulihka pemujur.
Ku iya, enti sema pengandal tu diberi ngagai GPS, ari nya tadi deka ngemuntangka perintah nengeri ti deka mai sereta meri pemansang ba Sibu sereta mega ulih meri pemaik ngagai rayat ba ditu.
“Kitai patut meri pemujur tu ngagai GPS enti sema kitai deka ke pemansang ba Sibu. Parti DAP (Parti Tindakan Demokratik) udah merintah ba tikas parlimen, tang apin ulih mantu rayat.
“Rega barang agi mar, ungkus belanja pengidup agi tinggi lalu rayat mengkang idup merinsa. Nya alai, aku ngarapka kitai sama bela nulung SUPP menang di Sibu lalu mantu Wong menang ba sitak Dudong,” ku iya.
Sama bisi datai iya nya Sapit Presiden II SUPP Datuk Chieng Buong Toon enggau raban temuai kebukai.