KUCHING: Semua rayat Sarawak patut beserakup sereta meri sukung ke tegap ngagai perintah nengeri ba pengawa nagang penama ekstremis ke Sarawak.
Presiden Parti Sa’Ati Rakyat Sarawak (SUPP) Dato Sri Dr Sim Kui Hian madah, nya dikena nyeliahka penemu ke jai ngeruga pengelikun enggau penyerakup pupu bansa di nengeri tu.
“Siti isu ti ditapi menua iya nya ekstremisme ti balat nyadi diatu, amb ika chunto baka ngenggaika pengawa ngiyas ungkup Taun Baru China (TBC) di SMK Bandar Puchong 1 di Selangor kelimpah ulah nguji ngelaban status undang-undang sekula China enggau Tamil dalam konstitusyen.
“Semua tu deka ngeruga pengelikun pupu bansa di menua kitai lalu enti ketuai mengkang enda betati sereta ngambi atur ke terit ngagai ektremis tu, menua Malaysia dipelabaka deka charut.
“Nya alai, nyadi rayat Sarawak kitai patut temegahka pengelikun pupu bansa sereta sama bebasaka pangan diri di nengeri kitai lalu anang ngaga bida bansa, jalai pengarap enggau pelajar nyadi isu,” ku iya ba pesan Taun Baru China ditu, kemari.
Menteri Kaunsil Kandang Menua enggau Pengawa Berumah nya madah, Sarawak bisi mayuh pupu bansa ke ngasuh kitai nyelai laban pupu bansa nya ngintu pengerami bukai ti ngemeranka pengawa ngabang ngagai pangan diri enda ngira bansa enggau jalai pengarap.
Ku Dr Sim, nya mih aset pengelikun pupu bansa semua rayat Sarawak ti patut nyadi reta ke pemadu berega.
“Berebak enggau nya, semua rayat Sarawak patut nyaga sereta meri sukung ke tegap ngagai perintah kitai ti nagang eksterimis tama ke Sarawak, dikena nyeliahka pemenu ke jai dibai tama kitu,” ku iya nyemetak.
Ku iya, endang amat ari baruh pegai Gabungan Parti Sarawak (GPS),perintah Sarawak ulih nyaga pengelantang pendiau semua rayat Sarawak enggau manah nengah mayuh bengkah chara sereta ngatika diri, taja pan disiping ari sukut ekonomi sereta pemansang ari perintah besai, Pakatan Harapan (PH).
Ku Dr Sim, taun 2020 nyadi pengemun baru ke Sarawak ngambika lebih lantang sereta tegap.
“Juluk enggau visyen perintah Sarawak nyata amat sereta tegap, iya nya deka nyapai asil ekonomi ti nyelai manggai ba taun 2030.
“Enti deka nyadi nengeri ti kaya, nya bisi dua renggat iya nya ekonomi enggau pengelandik. Ungkup ekonomi, pemansang ekonomi Sarawak diatu manah lalu dianggarka mansang manggai entara 5.5 nyentuk enam peratus ti ulih dijapai taun tu,” ku iya.
Ba timpuh ke sama ku iya, perintah Sarawak deka terus ngiga bemacham chara dikena nambahka asil nengeri tu.
Ba isu pengelandik ku Dr Sim, Sarawak begunaka mayuh agi orang ke landik gawa dalam mayuh bengkah bidang.
“Enti Sarawak ngembuan mayuh orang ke landik, kitai deka bisi pemansang ke manah agi ungkup Sarawak, laban semina rayat Sarawak nemu utai ti dikedeka ke Sarawak,” ku iya.