MIRI: Gabungan Parti Sarawak (GPS) deka nentuka semua guna enggau penanggul rayat ba renggat baruh deka diputar ngena chara berenggat.
Menteri Perengka Pengangkut Sarawak Lee Kim Shin madahka perintah nengeri nengah GPS udah nyendiaka mayuh inisiatif ti mantu ngelempungka tating penusah rayat.
“Perintah udah nyendiaka bantu indai ti beranak RM450, nembiak mit ti baru ada bulih insentif RM1,000 nengah Endowment Fund (EF) lalu orang lunggar umur 60 taun ke atas nerima Kenyalang Gold Card,” ku iya nerang.
Lee ke mega Kaban Kunsil Nengeri (ADUN) Senadin madah munyi nya beserimbai enggau pengerami ngintu taun keterubah logo GPS ba Palan Servis DUN Senadin kemari.
Pia mega, ku iya, ukai semina inisiatif perintah, isu ti bekaul ba kandang menua baka penanggul sistem parit, lampu jalai enggau ke bukai deka diputar enggau efisyen.
“Kitai deka tetiap penanggul infrastruktur nya dipadahka ngagai pengari rayat GPS ngambika nya ulih dibai ngagai ejensi ti bekaul lalu ulih diputar,” ku iya.
Nitih ku iya, perintah di menua tu mega udah nyiri kunsilor ti nyadika malin ke mega dikena matau penanggul ba kandang menua sida empu.
“Kunsilor deka bejalaika tanggungpengawa dalam mantu mai penanggul tauka isu nya terus ngagai ejensi ti bekaul tauka ngagai pengari rayat,” ku iya nerang.
Berindik ari nya, rayat Sarawak enda patut saru entara logo GPS enggau logo Barisan Nasional (BN) laban Sarawak enda agi dipegai ari baruh BN.
GPS tu ngaul parti ti digempung iya nya Parti Pesaka Bumiputera Bersatu (PBB), Parti Sa’ati Rayat Sarawak (SUPP), Parti Rakyat Sarawak (PRS) enggau Parti Progresif Demokratik (PDP).
Logo GPS iya nya ti belambangka burung kenyalang bechura mirah enggau chelum kelimpah ari belakang nya bechura burak, udah tentu dipeda ‘nyelai’ ngagai penyukung tegap parti ti bepelasarka menua tu.
“Kitai benung chakah madahka reti logo GPS ke mega ngembuan rambai jaku ‘Utamakan Sarawak’ ti dalam jaku bukai kitai bebendar ngetanka semua hak Sarawak ti majak lenyau,” ku iya nyemetak.
Chura mirah iya nya kelai ngeringka konstitusyen nyengkaum hak nyaga undang-undang nengeri sereta ngetanka Konstitusyen Perintah Besai.
Burak kelai ti enda bechiping enggau sama bela sereta mega ngeringka undang-undang, lalu chelum iya nya kelai penegap gempung parti komponen dalam GPS.