KUCHING: Presiden Parti Sarawak Bersatu (PSB) Dato Sri Wong Soon Koh deka ngenanka kerusi Kunsil Nengeri (DUN) Bawang Assan ba Pengawa Bepilih Nengeri (PRN) Ke-12.
“Aku deka ngenanka kerusi Bawang Assan ba PRN nya ila. Parti Pesaka Bumiputera Bersatu (PBB) udah nyerang aku...Mandal Presiden PBB Dr Annuar (Rapa’ee) enggau Romeo (Ketuai PBB Bawang Assan ke mega Sekretari Politik Kepala Menteri Romeo Christopher Tegong) mega madah munyi nya.
“Aku deka nguluka parti (PSB) ba perang tu laban aku Presiden parti,” ku iya lebuh dikerandau pengudah nyuaka pemeri Taun Baru China ngagai 26 iku ke nguan Salvation Army Boy’s Home ditu.
Soon Koh ke mega penyandang kerusi Bawang Assan pengelama enam penggal lalu ba PRN Ke-11 iya bediri minta pilih nyadi chalun terus, udah mujur ngenanka kerusi pengudah ngalahka chalun ari Parti Tindakan Demokratik (DAP) Stanley Chiew Sung Ngie ti bulih 4,884 undi.
Kena bulan Julai 2019, Soon Koh madahka parti nya deka nyadi parti ngatika diri, enda begulai enggau Gabungan Parti Sarawak (GPS) agi pengudah iya ngelengkaka pangku pengawa nyadi menteri kabinet nengeri.
“Kami deka bediri minta pilih ba naka pemayuh kerusi (DUN) ke diasai ulih alai menang nyengkaum kerusi PBB. Diatu tebuka ba kami.
“Tu menua demokratik, sesapa aja tauka barang bagi parti bediri minta pilih nyatup parti bukai, ke pemadu manah deka menang,” ku iya seraya madahka PSB nyerahka nya magang ngagai rayat ngambika ngaga pemutus.
Soon Koh mega ngenukuka parti nya udah milih chalun ke deka bediri minta pilih ba lima kerusi DUN maya PRN Ke-12 ila baka Datu Ranum Mina (Opar), Tasik Biru (Datuk Dr Tiki Lafe), Balai Ringin (Datuk Masir Kujat), Batang Ai (Datuk William Nyalau Badak) enggau Engkilili (Dr Johnical Rayong Ngipa).
Ungkup chalun kerusi DUN Mambong ku iya, parti mengkang bedau ngaga pemutus sereta benung berundingka beberapa nama.
“Kami bisi beberapa chalun ke bepotensial ti patut diperatika. Kami dekaka chalun ke ulih menang nyengkaum ba kerusi majoriti China. Enti udah datai ba maya iya, kami deka mantaika nya sesiku ila,” ku iya.
Sebedau tu Soon Koh madahka PSB deka chakah agi gawa dikena nentuka kerusi Mambong ulih diempu parti nya taja pan deka napi pemar ari GPS enggau Pakatan Harapan (PH) maya PRN ila.
Diatu penyandang kerusi nya, Datuk Dr Jerip Susil sebedau tu kala nyadi Sapit Presiden PSB.
Jerip madahka diri ningkilka diri ari PSB kena 11 Julai 2019 ti madahka kebuah ngemeratka bansa Bidayuh ngambi ngembuan penyerakup ke tegap.