Anda di sini

KM: Servis bas sekula enda bebayar dipejalaika Mei 2020

 Abang Johari lebuh ti bejaku maya bejadi Opis CUEPACS Nengeri Sarawak di Jalai Bampflye Kuching. — Gambar Muhd Rais Sanusi
MERI JAKU TANGKAN: Abang Johari lebuh ti bejaku maya bejadi Opis CUEPACS Nengeri Sarawak di Jalai Bampflye Kuching. — Gambar Muhd Rais Sanusi
 Abang Johari lebuh ti bejaku maya bejadi Opis CUEPACS Nengeri Sarawak di Jalai Bampflye Kuching. — Gambar Muhd Rais Sanusi
MERI JAKU TANGKAN: Abang Johari lebuh ti bejaku maya bejadi Opis CUEPACS Nengeri Sarawak di Jalai Bampflye Kuching. — Gambar Muhd Rais Sanusi

KUCHING: Kepala Menteri, Datuk Patinggi Abang Johari Tun Openg madah, servis bas sekula enda bebayar di mengeri tu dipelabaka deka berengkah dipejalaika dalam bulan Mei taun baru.

Ku iya, opis ke mangku tanggungpengawa nya benung beratika jalai enggau penyampau bas ti dikena ke tuju nya.

“Dikena ngepunka servis bas sekula enda bebayar tu di mengeri Kuching, enti nya mujur deka dikerembai ngagai (mengeri) Miri, (bandar) Sibu enggau Bintulu,” ku iya.

Iya bejaku munyi nya ba pengerami bejadika Opis Kongres Kesatuan Pekerja-Pekerja Dalam Perkhidmatan Awam (CUEPACS) Sarawak di Banglo Wang, Jalai Bampfylde ditu, kemari.

Ku Abang Johari, bas nya deka nyendiaka servis ngena konsep ‘hop on-hop off’ iya nya bala nembiak tau nepan bas nya ke sekula sida nengah jalai ti disediaka.

“Kami benung beratika sekeda jalai ba kandang Petra Jaya nyengkaum Matang sereta di Kuching selatan nyentuk ke Tabuan Jaya.

“Kami meri servis bas sekula enda bebayar tu ngagai semua ukai semina ngagai pengereja pengawa perintah nengeri tauka perintah besai dikena mantu ngelempungka tating belanja ti ditanggung apai indai ke mayar tambang bala anak sida ti nurun besekula,” ku iya.

Pun bulan November tu tadi, lebuh bejuraika Bajet 2020, Abang Johari madahka perintah nengeri meri Servis Bas Sekula Enda Bebayar taun depan di mengeri Kuching.

Ku Abang Johari, kelimpah ari nya servis tu mega ulih mantu ngurangka penyekut jalai dalam kandang mengeri.

“Tu deka nyadi inisiatif pengemun ngagai sekeda mengeri bukai ti dedat laban mensia mayuh di Sarawak kelebih agi di Bintulu, Miri enggau Sibu, nyema nya bisi pematut,” ku iya.