SIBU: Pemutus chalun Pakatan Harapan (PH) ti alah ba Pengawa Bepilih Mit (PRK) di Tanjung Piai kena Hari Enam nyin tadi, mandangka pengasa ati rayat sereta dikena ngajar perintah PH ti enda ulih ngamatka semaya sida ngelama tu.
Chairman Parti Sa’Ati Rakyat Sarawak (SUPP) Sitak Dudong Wong Ching Yong madah, pemutus PRK nya mandangka sada ati rayat ti chukup besai reti sereta nyemetak ngagai PH.
“Nya mih asil enti enda bejejimat nabur semaya ngagai rayat, langgur digaga ngelui ari pemisi enggau pengulih diri ti ngujungka sempekat ke disemaya nya enda ulih dikeamatka.
“Rayat udah asa sereta enda puas ati enggau perintah PH lalu utai ti udah nyadi ba Tanjung Piai, nya mih penemu enggau kuasa rayat,” ku iya lebuh bejaku ba Pengerami ‘Ulang Tahun Keagamaan’ Tokong Da Wan Gong, Sungai Menyan ditu, empai lama ke udah.
Ba PRK Tanjung Piai, chalun Barisan Nasional (BN) Datuk Seri Wee Jeck Seng ngalahka chalun PH Karmaine Sardini enggau majoriti 15,086 undi lalu ngerampas baru penuduk nya ari PH.
Iya madah, pengidup rayat ke diperintah PH ti enda ulih mutarka penanggul penatai pemisi baka ungkus belanja ngidup kediri ti majak besai, rega komoditi majak nurun kelebih agi minyak sawit lalu raban nembiak lelaki enggau indu mar bulih pengawa.
Nambahka nya, perintah PH nadai penemu enggau chara dikena mutarka penanggul penatai pemisi nya.
“Enti nitih kira ‘aritmetik’ ke udah dibantaiks, perintah nengeri beratka rayat tauka ngerah jari agi ari perintah PH lalu nadai pengawa ti ulih diandalks ari PH ke ngasuh kitai temegah ati,” ku tangkan jaku iya.