KUCHING: Perintah nengeri dalam perambu ngemansangka dua Taman Agro di Sarikei dikena ngangkatka sektor pengawa betanam moden di Sarawak.
Menteri Muda Perambu Mengeri, Pengatur Tanah enggau Rampa Menua, Datu Len Talif Salleh madah, Taman Agro tu bepalan di Sarikei iya nya di Parit Bugis lalu siti agi di Bintangor ba Sungai Sian.
“Ba Taman Agro tu ila, kitai deka numbuhka palan endur ngumpul ke alai kompeni besai deka meli buah ke ungkup dibungkus sereta dieksport ngagai menua luar.
“Kitai nguji ngelala semua industri ngambika kitai ulih bejalaika pengawa ngumpul ari kandang menua ke ngeluar buah nyengkaum pekebun mit,” ku iya.
Dulu agi ari tu, Len Talif ke mega Kaban Kunsil Nengeri (ADUN) Kuala Rajang ngatur aum media ba opis iya, Tingkat 17, Wisma Sumber Alam sentang Pengerami ‘Pesta Nanas dan Buah-Buahan Sarikei’.
Pesta Nanas enggau Buah Sarikei tu deka diatur kena 22 November tu ngagai 1 Disember 2019.
Sentang pekara bekaul pengawa ngeluarka nanas, Len madah, nya endang udah dipejalaika di di Tanjung Manis enggau di Sarikei.
“Kitai deka ngerembaika agi pengawa ngeluarka nanas tu dudi hari ila,” ku iya nambah.
Kelimpah ari nya, perintah mega benung chakah bejalaika projek betanam fertigasyen dikena ba pengawa ngeluarka semangka madu tauka ‘honey melon’.
Ku iya, taja buah dikeluar enda mayuh ungkup dagang eksport tang nya seruran enda chukup dikena ungkup dagang menua tu.
“Penemu tu iya nya enti deka numbuhka pengawa betanam chara fertigasyen ngagai peranak kandang menua tu, pengawa nya mesti dipejalaika ti enda ngena tanah ke besai,” ku iya.
Len mega meransang komuniti nyereta ba pengawa betanam fertigasyen tu dikena ngangkatka agi tikas ekonomi sida.
Perintah ku iya nyendiaka mayuh macham bantu ungkup sida kedeka nyereta ba pengawa betanam nyengkaum agih belanja sepenyampau RM200 juta.