KUCHING: Opis Menteri Pelajar, Sains enggau Pansik Teknologi (MESTR) ngarapka perintah besai nengah Opis Menteri Pelajar Malaysia (KPM) nyendiaka ungkup belanja ti chukup ba taun 2021 dikena bejalaika program dua jaku (DLP) tauka ngajar Sains enggau Matematik ngena Jaku Inggeris (BI).
Menteri opis nya, Dato Sri Michael Manyin Jawong madahka ba bulan April taun tu, Menteri Pelajar Dr Maszlee Malik minta Kepala Menteri Sarawak nerima pinta ngajar subjek Sains enggau Matematik dalam BI ba Sekula Primari.
Lalu ku iya, Kepala Menteri nerima pinta nya lalu sekeda aum entara KPM enggau MESTR udah dipejalai sereta ngaga pemutus program nya berengkah dipejalaika ba nembiak Primari Satu dalam taun 2020.
“Ungkus belanja dikena bejalaika program DLP ba taun 2019 iya nya RM11 juta ti ditanggung penuh Perintah Nengeri.
“Ungkup belanja ti lebih besai dikena bejalaika program tu ti berengkah ba taun 2020.
“Kami ngarapka KPM deka nyendiaka ungkup belanja ti chukup dikena bejalaika program tu ba taun 2021 enggau taun ke bukai,” ku iya lebuh ti nyimpul jurai Opis Menteri Pelajar, Sains enggau Pemansik Teknologi.
Manyin mansutka pekara nya ba Aum Ke-2 penggal Ke-4 Kunsil Nengeri (DUN) Sarawak Ke-18 di Kompleks DUN ditu, kemari.
Bejaku baru, iya madahka nya (DLP) pemar besai ditapi MESTR enggau Sarawak sereta nengeri tu ti enda tau enda mujur.
Enda mujur reti nya anak kitai Sarawak deka tinggal ba pekara sainstifik, ku iya.
“Aku ngarapka peranak Sarawak, kelebih agi pengari rayat sekalika perintah enggau penyakal dalam Dewan Rakyat tu deka meri sukung ngagai inisiatif besai tu ke penguntung anak kitai jemah ila,” ku iya.
Dulu ari nya Manyin madah dikena perintah nengeri nyikap diri bejalaika DLP 2020, JPNS enggau kerejasama MESTR sereta ejensi ti bekaul bisi nyendiaka modul dikena ngelatih pengajar, ngatur program ‘Train-the-Trainer’ ungkup 630 pengelicha IPG, English Language Teaching Centre (ELTC) enggau pemesai ari JPNS.
“Nambahka nya, bisi 2,853 pengajar Sains enggau Matematik sekula primari ke ngajar Primari 1 taun baru enggau pemesai ti bekaul.
“Meri licha ngagai Kepala Pengajar enggau pemesai Kanan ari semua 31 PPD di Sarawak kelimpah ari ti nyelak bup teks enggau bup kereja Sains enggau matematik dalam BI.
“Bup Teks enggau bup kereja udah dichelak deka disadung ngagai semua sekula ujung bulan November,” ku iya seraya madahka MESTR mega bisi nyendiaka kereban dalam BI dikena mantu pengajar.