Dikarang Rengenyan Labang
KUCHING: Pengereja pengawa perintah nengeri Sarawak deka diberi Bantu Khas Mata Duit dua bulan batang gaji tauka minimum RM2,000 ti dibayar sebedau ujung taun tu.
Kepala Menteri Datuk Patinggi Abang Johari Tun Openg madahka nya ngayanka perintah Gabungan Parti Sarawak (GPS) beratka pengelantang pendiau raban pengereja pengawa perintah nengeri Sarawak.
"Perintah GPS amat beratka pengelantang pengereja pengawa perintah nengeri Sarawak lebih agi ke betapi enggau tating belanja ketegal ungkus pengidup ti majak niki.
"Berindik ari nya, perintah GPS udah ngaga pemutus deka meri Bantuan Khas Kewangan dua bulan batang gaji tauka minimum RM2,000 ngagai pengereja pengawa perintah nengeri Sarawak sereta dibayar sebedau ujung taun tu," ku iya ti mega Menteri Wang.
Abang Johari mantaika pekara nya lebuh ti nyimpul jurai ba Aum Ke-2 Penggal Ke-4 Kunsil Nengeri (DUN) Sarawak Ke-18 ba Kompleks DUN ditu, sehari tu.