LUBOK ANTU: Pelajar iya nya tiang pemun sereta kunchi ti pemadu beguna dalam pengidup kemaya hari tu.
Kaban Parlimen (MP) Lubok Antu Jugah Muyang madah, enti nadai pelajar komuniti kitai pedis deka neruska pengidup jemah ila.
Berindik ari nya, udah nyadi tanggungpengawa apai indai diatu nyendiaka pelajar ti pemadu manah ngagai anak sida.
“Anang kita ngerunding nyendiaka pelajar ngagai anak kita tu siti pekara ti nating pengidup tang nya mih nyadi puku ti manah ungkup pengidup dudi hari ila.
“Anak tu mih pesaka ti pemadu berega ungkup siti ruang bilik, lalu anak tu patut diiri enggau pelajar ari sida mit,” ku iya nyemetak.
Iya madah munyi nya lebuh ti bejaku ba pengerami ‘Majlis Apresiasi Kanak-Kanak Tabika dan Taska’ Opis pemansang Komuniti (KEMAS) Pelilih Lubok Antu ti bepalan ba Balai Pemancha Chua Teng Yew ditu, kemari.
Dulu agi ari nya, Pemesai KEMAS Pelilih Lubok Antu Marinda Stewart Thaim lebuh ti meri jaku pengerlalu iya madahka bisi 52 iku anak mit ari 25 buah tabika enggau dua buah taska KEMAS di pelilih tu nerima perais enggau setipikit sida ba pengerami tu.
Ku iya nambah, pengerami nya nyadi pengerami ninting taun ti diatur dikena meri basa sereta ngenukuka sida bala anak mit ti deka nyingkang ngagai renggat sekula primar kena taun nyin ila.
Sama bisi datai ba pengerami nya, Supervisor Anak Mit KEMAS Lubok ANtu Kumpang Datuk Tutong.
Ba pengerami nya, Jugah mega udah meri agih belanja sepenyampau RM20,000 ngagai KEMAS Lubok Antu dikena bejalaika aktiviti sida taun nyin ila.