MIRI: Pengawa raptai penuh pengerami ngintu Tuai Pemegai Menua (TYT) Yang di-Pertua Nengeri Tun Pehin Sri Abdul Taib Mahmud Ke-83 pagi kemari dipejalai enggau manah.
Meteri ti megai tanggungpengawa penuh dalam ngatur pengerami nya Datuk Talib Zulpilip madahka raptai sepengelama tiga hari pagi enggau lemai udah dipejalai enggau mujur taja bisi betapi enggau ujan beberis.
“Program raptai penuh seharitu udah bejalai enggau manah lalu aku mega puas ati semua raban ti bekaul udah meri komitmen ti tinggi dikena ngemujurka program nya sekali tu,” ku iya madah ngagai media sepengudah meda raptai penuh di Stadium Miri kemari.
Talib mega beterima kasih ngagai komiti, semua kontinjen enggau pesereta ti udah bebendar belatih sereta nentuka pengawa nyikap diri ke pengerami nya dipejalai enggau manah.
Kelimpah ari nya, Talib mega madah palan endur ngatur pengerami tu nyangka deka diganti nyema gaya hari ti enda engkeman lalu sida komiti pengatur deka ngaga ubah palan pengerami ti baru ku iya lebuh ti nyaut raban pemberita.
“Naka ke diatu kitai ngarap gaya mua hari maya pengerami nya Hari Enam tu ila manah lalu kitai mega deka besedia nyema bisi sebarang ubah tang bedau ulih ditentuka agi laban nitihka gaya mua hari,” ku iya.
Sebedau tu, komiti enggau kontinjen udah bejalaika raptai di Stadium Tertutup Miri kena Hari Dua laban Miri ti ujan bangat maya nya.
Taja pia, maya raptai penuh kemari, gaya mua hari ti bisi beberis enda ngeruga program nya.
Berebak enggau nya, Talib madahka tujuh program besai deka digaga semanjai tiga hari Pengerami Ngintu Ke-83 Taun TYT Yang di-Pertua Nengeri Tun Pehin Sri Abdul Taib Mahmud.
“Program keterubah iya nya pengawa bebaris ti disereta 104 kontinjen ti udah ngaul 3,927 pesereta di Stadium Miri kena 12 Oktober berengkah ari pukul 8 pagi.
“Kontinjen nya ti disereta 40 iku pengari tetiap opis enggau ejensi perintah, sektor peribit, Gerempung Ukai Dikuasa Perintah, gerempung sereta mega nembiak sekula,” ku iya nerang.
Menteri ba Opis Kepala Menteri (Integriti enggau Ombudsman) nya madah, pengawa bebaris berengkah sepengudah penatai Yang di-Pertua Nengeri enggau bini.
“Nya lalu ditangkan ke lagu Negaraku sereta tanda meri selamat datai enggau besembiang. Sepengudah nya, Yang di-Pertua Nengeri dibai meresa baris kontinjen ti ngambi bagi ba pengawa nya.
“Kelimpah ari nya, 'lintasan hormat' bilun Soldadu Langit Diraja Malaysia, bomba, Hornbill Skyway enggau helikopter polis ti mai menira menua enggau nengeri lalu ditangkan pengawa bebaris kontinjen sereta jaku pengelalu ari Kepala Menteri lalu pengerami melah kek hari pengada,” ku iya nyemetak.
Aktiviti ti narit ati iya nya pengawa mantaika gragik mensia ari 800 iku pesereta ti mantaika lumur 1936, 83 lalu kelai ati ti ditangkan enggau lagu sereta program enggau kerejasama Sarawak Arts Council.