Anda di sini

Gaga polisi dikena mantu rumah panjai di Sarawak

 Ali bejaku ba Pengerami Bejadi ‘Perdana MATC Nengeri Sarawak’ di Kuching malam Hari Minggu nyin tadi. — Gambar Muhammad Rais Sanusi
MERI JAKU PERANSANG: Ali bejaku ba Pengerami Bejadi ‘Perdana MATC Nengeri Sarawak’ di Kuching malam Hari Minggu nyin tadi. — Gambar Muhammad Rais Sanusi

KUCHING: Kaban Parlimen Saratok, Ali Biju minta Perintah Pakatan Harapan (PH) ngaga sebengkah polisi dikena mantu rumah panjai di Sarawak.

Ku Ali, ngelama ke ari baruh pegai perintah ke suba, nadai polisi tauka program ari perintah besai dikena mantu rumah panjai di nengeri tu.

“Lebih 50 peratus peranak di nengeri tu ngembuan rumah panjai lalu patut endar PH ngaga polisi nya.

“Tu ke dipinta kami sereta ngarapka nerima siti saut ke positif ari perintah besai,” ku iya.

Iya bejaku munyi nya ba Pengerami ‘Perdana Mesyuarat Agung Tahunan Cabang (MATC)’ Nengeri Sarawak ditu kena malam Hari Minggu nyin tadi.

Dulu ari nya ba jaku diya, Ali ke mega Mandal Presiden Keadilan madahka mayuh isu ti dikenataika raban penyakal ngagai PH ke bendar iya nya legasi ke ditanggung pengudah PH megai perintah ari Barisan Nasional (BN).

Nya alai ungkup Sarawak ku iya, sekeda ubah deka digaga ba pengawa nyadi ketuai ba renggat genturung pendiau ke lebih agi bekaul enggau isu nyiri ketuai bansa enggau ketuai raban bansa.  

“Ngelama tu perintah besai mantu perintah Sarawak mayar elawin ketuai genturung pendiau tang kerejasama ke diberi ketuai genturung pendiau ngagai perinttah besai enda chukup manah.  

“Ketuai bansa ditagang ngulu barang bagi pengerami ke diatur perintah PH tauka perintah besai.

“Asai aku enti bisi Komiti Pengatur Komuniti Genturung Pendiau (MPKK) di Sarawak, penatai perintah besai ba renggat genturung pendiau, rumah panjai deka diasaika rakyat di nengeri tu,” ku iya.

Ngenang pasal pengerami nya, Ali madahka program tu nyadika pengemun nyikap diri napi Pengawa Bepilih Nengeri (PRN) ke deka datai.

“Aku meda pengagit kita sereta minta bala kaban semua ngambika ngerembaika pengagit tu ngagai tetiap pampang, sitak kunsil nengeri enggau parlimen.

“Putrajaya udah dirampas kitai lalu kitai deka n gerampas Petra Jaya enda lama agi,” ku iya.