KUCHING: Opis Bekal Ai Menua Pesisir (JBALB) Sri Aman terus aktif nganjung bekal ai ngagai beberapa kandang endur ti suntuk ai ketegal gaya hari ti majak angat enggau rangkai.
Nitihku penerang berita opis nya, naka 13 September tu tadi, Opis nya udah nganjung bekal ai ke sepital, klinik enggai sekula di Sri Aman, rumah panjai di Pelilih Menua Lubok Antu, Pelilih Menua Engkilili sereta Pelilih Menua Pantu kelimpah ti ngisi tangki ai ba Puast Pengambilan Air Berpusat JBALB Sri Aman.
“Endur palan ngambi ai JBALB iya nya di mua opis Jabatan Kerja Raya (JKR) Sri Aman, flat Perintah Nengeri Kalan Kedang, dimua Penjara Sri Aman, Kampung Pakit enggau Pasar Lachau, Pantu,” ku opis nya nengah penerang berita, kemari.
Ke diatu, loji rawatan ba Bagi menua Sri Aman agi bejalaika operasyen.
“Bepelasarka penerang Loji Rawatan Air Bayai beoperasyen sepenyampau 60 peratus naka Hari Lima (Jumaat) tu tadi (13 September) enggau Palan Meresi Ai Pantu bejalaika operasyen lima jam sehari bepanggai ngagai tikas ai.
“lalu Palan Meresi Ai Lingga, Seduku enggau Stumbin bejalaika operasyen dua kali sehari iya nya pukul 8 ngagai 10 pagi enggau 3 ngagai 5 lemai enggau Palan Meresi Ai Skrang enggau Melugu mega bejalaika operasyen 50 peratus.
“Taja pia, operasyen ba Skim Pembangunan Lemanak udah diketuka laban tikas ai ti kritikal tauka balat,” ku penerang berita opis nya.
Berindik ari pekara nya, JBALB Sarawak minta mensia mayuh ngambika ngelimat sereta ngena ai ngena chara ti manah sepemanjai musim kemarau tu.
“Pengeliat ati peranak ke kena keruga penanggul ai ketegal gaya hari tu kami chukup beterima kasih,” ku penerang berita opis nya.
Semua penerang pemadu baru deka dipadahka nengah lama ‘Facebook’ rasmi JBALB Sarawak.
Sebarang sebana enggau tanya ulih betelefon ngagai Careline JBALB Sri Aman ba lumur 83-323240 tauka 323242.