KUCHING: Pemutus ti udah dipesetuju begulai bekaul enggau tujuh isu Sempekat Malaysia 1963 (MA63) naka ke diatu ngemuaska ati, pia ku Kepala Menteri Datuk Patinggi Abang Johari Tun Openg.
Abang Johari madah, tebal agi isu ti dipesetuju sereta diputuska nya bekaul enggau hak Sarawak bepelasarka sempekat nya.
Taja pia ku iya, ari 14 isu ke agi dikerandau sereta diperundingka endang sekeda nya bekaul enggau nengeri tu.
“Aku ngasaika kitai udah bisi pemutus aum ti ngemuaska ati naka ke diatu, baka penerang ti dipansutka Opis Menteri Besai.
“Ari isu ke udah diputus sereta dibantaika nya, kebendar kitai bisi enam isu udah diputuska lalu siti isu ungkup Sabah.
“Taja pia agi bisi sekeda isu agi dikerandauka komiti teknikal. Siti ari isu iya nya bekaul enggau beratika baru pasal pekara wang ti benung dikerandauka,” ku iya seraya madah meri awak ngagai komiti teknikal mutarka isu nya.
Abang Johari mansutka pekara nya lebuh dikerandau raban pengarang berita bekaul enggau tujuh isu MA63 ti udah sama dipesetuju sereta 14 isu ke agi dikerandau.
“Lalu siti agi (ari 14 isu) iya nya kitai deka terus naruh status Kort Tinggi Borneo (Sabah enggau Sarawak). Tu aku ngasaika sida nitihka prinsip setuju ngenanka Kort Tinggi Borneo enggau Mahkahmah Tinggi Malaya,” ku iya seraya nyebut sekeda ari 14 isu ke agi tauka benung dikerandauka.
Ensanus, bepelasarka ripot Bernama, Opis Menteri Besai dalam penerang ke dipansutka madah naka 23 Julai tu tadi bisi tujuh isu MA63 udah dipesetuju begulai lalu 14 isu agi begunaka timpuh endur dikerandauka sereta dipelaba deka diputuska sebedau 31 Ogos tu.
Komiti Khas Kabinet ti Meresa Atur Sempekat Untuk Malaysia udah minta Raban Pengereja Pengawa Khas Sempekat Malaysia 1963 nyendiaka siti ripot kepenudi sebedau 31 Ogos tu, ngambika dibantai dalam aum Komiti Khas Kabinet ke deka datai.
Pemutus nya udah dipesetuju dalam Aum Komiti Khas kabinet nya kena 23 Julai tu tadi ti digulu 23 kaban Komiti nya ti nyengkaum Menteri Kabinet Perintah Besai, Kepala Menteri Sarawak, Kepala Menteri Sabah enggau pegawai tinggi perintah besai, Sarawak enggau Sabah.
Enam isu bekaul Sarawak ke udah dipesetuju begulai iya nya pemintaduti eksport kayu ramu enggau asil kampung; nyadung gis enggau kuasa nyaga kuasa karan enggau gis, pengawa bejalaika kerja raya perintah besai enggau nengeri; pengereja pengawa kasar, kuasa nengeri ba isu pengerai sereta isu betanam betupi enggau kampung.
Isu ti bekaul enggau Sabah aja iya nya Ngatur Pulau Sipadan enggau Ligitan.
Kelimpah ari nya, lebuh ditanya bekaul enggau isu hak minyak enggau gis ti deka dikerandauka enggau Menteri Besai Tun Dr Mahathir Mohamad terus enggau Menteri Besai Sarawak enggau Sabah, Abang Johari madahka pekara nya udah diputuska.
Isu hak minyak enggau gis benung dikerandau sereta enda dikerandauka ba renggat Komiti Pemandu.
“Kami ngaga pemutus (isu minyak enggau gis) dikerandau entara Menteri Besai, aku empu enggau Kepala Menteri Sabah.
“Au (enda dikerandauka dalam Jawatankuasa Pemandu) laban tu pekara khas. Benung dikerandauka.
“Enti udah tembu madah ke kita (media),” ku iya.
Dulu ari nya Abang Johari nerima penemuai basa dua gerempung ukai dikuasa perintah (NGO) ba opis iya di Wisma Bapa Malaysia ditu, kemari.