SEPANG: Menteri Besai, Tun Dr Mahathir Mohamad ngelalau madah semua rayat menua tu sekalika di Sabah, Sarawak tauka Semenanjung iya nya rayat Malaysia.
Bejaku ba pengarang berita ditu kemari, Tun Mahathir madah, sentimen Sabah ungkup Sabah, Sarawak ungkup Sarawak, Semenanjung ungkup Semenanjung nya pekara ke enda manah.
“Kitai ngarap kitai semina ulih berunding nyadi rayat Malaysia ukai nya nyadi kandang menua siku-siku,” ku iya.
Dulu agi ari tu, Tun Mahathir ngatur penemuai meri basa ngagai indu Opis AirAsia RedQ ditu ba pengawa mandangka pejalai bilun dudi hari enggau palan penerebai digital.
Bisi mega datai iya nya Menteri Perengka Pengangkut, Anthony Loke sereta begulai enggau Eksekutif Besai AirAsia nyengkaum Ketuai Pemesai Eksekutif Tim AirAsia sereta AirAsia.com, Tan Sri Tony Fernandes.
Bekaul isu Dr Zakir Naik, Tun Mahathir nyemetak madahka perintah ulih matak baru status peranak mendap (PR) pengelicha pengarap nya sema amat iya mansutka penerang ke nyeruga pengelantang menua.
“Ungkup maya diatu, polis agi mansik skalika iya mantaika penerang ke bakanya tauka enda.
“Endang patut, enti sema iya ngaga pekara nya, patut ba kitai narit baru status PR iya.
“Sigi patut, kitai meseti bejalaika atur dikena nyeliahka iya mantaika penerang ke ulih ngenataika penyarut ba raban bansa di Malaysia,” ku iya.