KUCHING: Perintah Malaysia dipinta berundingka baru pemutus deka nyaga pendakwah tebilang Dr Zikri Naik, ke pemaik enggau pengelantang rayat sereta menua.
Kaban Parlimen (MP) Puncak Borneo, Willie Mongin madahka, anang semina deka nyaga siku orang tang enggau gaya literal ‘munuh’ mayuh rayat Malaysia.
Ku Willie, nyema Zakir enda salah iya mesti diuji enggau undang-undang menua iya empu.
“Sekalika kitai besedia nyaga tauka ngelindung Zakir lalu ngeruntuhka penyerakup menua enggau nempa lebih mayuh pemenchi ba rayat Malaysia? Bakani kitai ulih ngemeranka penaluk, inspirasyen enggau ‘HARAPAN’ Malaysia baru tu?
“Aku ngapil ngagai Perintah Malaysia ngambika berundingka baru pemutus sida ti nyaga tauka ngelindung Zakir Naik.
“Lalu nyadi kaban parlimen, aku deka ngapil betulis ngagai Menteri Besai (Tun Dr Mahathir Mohamad),” ku iya meri penerang bekaul enggau Zakir nengah media rama ‘Facebook’, kemari.
Willie madahka iya lebih ari sedekad enggau bala bakih berundingka pekara negika keadilan, pemansang sereta pemaik enggau pengelikun ke menua ti dikesayau.
Dr Zakir dalam ceramah di Kelantan apain lama didawa udah mandingka raban bansa Hindu di Malaysia ti dipadahka lebih mayuh pengelebih dibandingka enggau raban bansa Islam di India.
Pengelicha nya mega madahka raban bansa Hindu di Malaysia lebih talukka Menteri Besai India, Narendra Modi dibandingka enggau Menteri Besai Malaysia, Tun Dr Mahathir Mohamad.
Taja pia diatu polis udah muka keretas pansik ngagai pendakwah nya ari baruh Seksyen 504 Kanun Keseksaan laban ti ngeluarka penerang ke ulih ngeruga pemaik enggau pengalantang.