BINTULU: Festival Gudi Antarabansa Borneo Bintulu (BIKF) deka mandangka aktiviti ke manah ari bala pesereta dalam menua enggau antarabansa dalam beberapa ketegori mandangka sereta pekit gudi kena 25 nyentuk 29 September ba Palan Penerebai Lama Bintulu.
Entara aktiviti ke manah nya baka ‘Giant Kites’,Sport Kite/Revolution Kite, Single-line Traditional Kite/Modern Kite’ enggau `Wind Garden Kites’ nyengkaum besemekih ba `Asia Pacific Sport Kite Challenge(APSKC)’.
Ngambi bagi ba tikas menua nyengkaum tujuh nengeri enggau 17 iti kelab pelayang ke mungkur 66 iku pelayang.Ngambi bagi ba renggat menua nyengkaum Sarawak(29),
Johor(6), Kedah(2), Kuala Lumpur(8), Melaka(8), Perlis(9) sereta Terengganu(4).
Pia mega, pesereta ke ngambi bagi renggat antarabansa mungkur 30 buah menua baka Australia(1), Belgium(2), Kanada(3), China(5), Columbia(1), England(3), Estonia(2),
Perancis(6), Jerman(1), Hong Kong(4), India(2), Indonesia(8), Itali(4), Jepun(10), Malaysia(66), New Zealand(1), Filipina(1), Poland(2), Portugal(2), Moscow Russia(1), Singapura(10), Afrika Selatan(1), Sweden(1), Switzerland(2), Taiwan(4), Thailand(3), Tunisia(2), Turki(2), Amerika Syarikat(1) enggau Vietnam(2) lalu penyampau bisi 153 iku pelayang.
Pengerami tu dipelaba deka dipejadika Menteri Dagang Temuai,Seni Nembiak Lumba enggau Main Sarawak Datuk Abdul Karim Rahman Hamzah kena jam 2 lemai 28 September di Khemah Utama BIKF 2019.
Aktiviti ke bukai iya nya mantaika gudi moden enggau asal renggat menua, demostrasyen, woksyop ngaga wau asal enggau gudi, mandangka ‘Stunt Kite’ ari pesereta antarabansa enggau ari raban sereta pelayang ke tebilang dunya,’Lolipop-Drop’ ungkup nembiak mit enggau orang tuai, panggau main asal lalu diperindang penyanyi popular enggau di nengeri tu tetiap malam semanjai timpuh pengerami nya diatur nyengkaum ekspo dagang.
Perkara itu dikenataika Menteri ba Opis Kepala Menteri (Integriti enggau Ombudsman) ke mega Kaban Kunsil Nengeri (ADUN) Datuk Talib Zulpilip nengah penerang media Opis Pemansang Bintulu (BDA) di Kuching kemari ke digulu Menijer Besai BDA Rodziah Morshidi enggau Residen Bagi Menua Bintulu Jack Aman Luat.
Aktiviti BIKF kenyau taun 2005 nya sebengkah alai bekomunikasyen mayuh bengkah bansa ke datai ari sosio-ekonomi enggau penemu politik ke bebida kelimpah dikena mantaika seni main asal di nengeri tu ngagai temuai menua tu enggau antarabansa nengah pemisi pengawa mantaika main asal maya malam nya, ke meri peluang dagang ngagai pedagang mit lalu ngelaluka produk sereta pemakai asal nengeri ngagai komuniti luar.
Iya diguna ngambika mengeri Bintulu nyadi sebuah palan dagang temuai enggau palan ngelantangka ati kelebih agi sida ke rindu ba lumba main layang-layang lalu dikena mantaika produk pemakai asal Bintulu.
Kenyau BIKF nya diatur 15 taun ke udah, bisi sekeda rikod mujur dipechahka sida pengatur pengawa dalam `Malaysia Book of Records’ iya nya nerebaika 1,655 iti layang-layang enggau seretai pengelama 20 minit ba siti palan kena taun 2008 sereta nerebaika 92 iti set layang-layang berangkai (Train-kites) enggau tetiap siti set bisi 100 iti layang-layang diterebaika seretai pengelama 20 minit kena taun 2010.
Ditangkan mechah rikod ke lama, nerebaika 2,550 iti layang-layang ba 2013, nempa rikod ‘The longest Arch Kite Tunnel’ sepanjai 500 meter enggau 2,500 iti layang–layang kena 2014, mechah rikod lama ‘The longest Arch Kite Tunnel’ penyampau 5,650 iti `train kite’ ba 2015 lalu nempa rikod ‘The Longest Wind Garden Street’ taun 2017.
Kena 2018, BIKF udah ngatur `1st Global Sportkite Freestyle Challenge’ ke bisi mandangka sekeda pemain ‘sportkite’ ari Jepun, China, Taiwan, Belanda,
Singapura, Australia, Eropah enggau Amerika. Pesereta Malaysia mega ngambi bagi ba pekit tu lalu udah bulih penuduk ke-9.
Serimbai BIKF 2019, pengatur pengawa sekali agi nguji mechahka rikod taun 2015 dalam pekit `The Longest Arch Kite Tunnel’ iya nya nguji ngaga sebuah ‘gerbang layang-layang terowong pemadu panjai ‘ dikena mechahka rikod lama taun 2015.