KUCHING: Opis Bomba enggau Penyelamat Malaysia (JBPM) Sarawak ngarapka api ti nganguska tanah kerapa kelebih agi di Miri ulih dipadam magang sebedau sesi belajar enggau ngajar berengkah minggu baru.
Direktor JBPM Sarawak, Khirudin Drahman ngarapka operasyen ngerara api ba tanah kerapa di Kuala Baram, Miri ngena chara ‘water bombing’ ngena Bombardier ti dipejalaika Ejensi Penerit Adat Maritim Malaysia (APMM) ulih mujur.
“Bombardier sehari tu (kemari) dipejalaika di Miri. Aku amat ngarap lalu kitai besampi ngambika api (ba Kuala Baram, Miri) nya ulih dipadam laban minggu baru Hari Satu sesi besekula deka berengkah.
“Laban ba kandang ILP bisi beberapa sekula enggau sekeda sekula di Kuala Baram, (nyema api majak nyadi) tu deka meri penanggul ngagai sekula, enti enda kemisi sida dilanjarka ungkup sekula ti bekaul,” ku iya.
Khirudin mansutka pekara nya lebuh dikerandau pengudah bejadika Konvensyen ‘Kumpulan Kreatif dan Inovatif JBPM Negeri Sarawak’ ba Pustaka Negeri, kemari.
Berebak enggau tu lebuh ditanya sentang penyukup aset enggau raban dikena napi penyadi api ketegal orang ti betunu, Khirudin madah,ke diatu chukup sereta kemisi raban bomba mega enda dibekuka.
Nitihku timpuh syif raban ke gawa ditambah ari 12 jam ngagai 24 jam dikena nentuka penyampau raban nya chukup.
“Enti sehari syif bisi 12 jam kami bisi 20 iku raban ba siti syif, tang enti syif 24 jam reti iya bisi 35 raban gawa sereta aku udah minta kereban ke dikena mega seruran disediaka.
“Kitai nguji enggau pengabis manah (mutarka penusah tu), Hari Empat, Lima enggau Hari Enam tu sebedau sesi belajar enggau ngajar berengkah baru,” ku iya.
Berebak enggau tu Khirudin ngarapka mensia mayuh, pekebun mit, orang bumai enggau pengempu kebun bedandang besai ngambika enda betunuka babas sereta kampung berindik ari gaya hari diatu ti kemarau.
Bepelasarka ripot Opis Pengemata Gaya Hari, nengeri tu deka dituntung gaya hari ti angat tauka kemarau nyentuk bukan Oktober tu ila.
“Lalu bepelasarka pekara ti dipadahka ngagai kami, barang sapa sida ti muka kebun bedandang besai baru, NREB bisi nyain Memorandum Pemereti Ati (MoU) enggau pengempu kebun bedandang besai nya, patut nitihka prosedur.
“Ukai kami nagang pemansang, kitai enda ulih rari ari pemansang tang lebuh sida bejalaika tu (pengawa betunu) titihka mih chara ti betul, anang ukai semina deka ngelimat ungkus belanja, laban nuan ngenusah orang bukai,” ku iya.
Lebuh ditanya penyampau enggau isu ulah jai ti bekaul enggau betunu tu, Khirudin madahka pekara nya bisi diripot ngagai polis. Ku iya, ulah jai nya enda muntang ditapi laban sida nya ngereja nya malam hari sereta sida ngena sekeda kereban tauka pelin dikena nungkun api.
“Kami udah minta polis bejalaika pansik lalu NREB mega sama bejalaika pengawa.
“Kami ngarapka mensia mayuh ulih mereti, enti nuan enda lantang ati enggau orang bukai tang anang enda ingat nuan mega ngeruga orang bukai.
“Ngarapka mensia mayuh meri kami penerang nyema bisi meda orang ngereja pekara ti enda patut padah ngagai opis bekuasa, opis bomba, NREB tauka polis ngambika kami ulih neritka atur tumu lalu nyeliahka ari penusah angus nyadi,” ku iya.
Nyempulang Khirudin maya dikerandau raban pengarang berita kemari Penulung Direktor Operasyen JBPM Sarawak Tiong Ling Hii enggau ke bukai.