BINTULU: Apai indai diperansang ngambika seruran bekunsi penemu enggau pengajar di sekula dalam nyendiaka sida enggau program Pentaksiran Bilik Darjah (PBD) ti deka ngetuka pengawa peresa tengah taun enggau ujung taun ungkup nembiak tahap satu di semua sekula primari dalam taun tu.
Pemesai Pelajar Pelilih (PPD) Tatau Samri Suhaili madah, PBD deka dikena kelebih agi ungkup nembiak tahap satu iya nya nembiak tu deka diberi poin ari pengajar bekaul pelajar sida.
“Apai indai mega diperansang datai ke sekula lalu enda ibuh nganti maya hari pengajar betemu enggau apai indai ngambika sida nemu chara program tu dipejalai,” ku iya lebuh ti bejaku maya bejadi ‘Program Ibadah Korban’ di PPD Tatau kena Hari Dua tu tadi.
Iya madahka, PBD iya nya program dikena meda tikas pelajar nembiak ti dipejalai berengkah taun 2019 lalu kitai meransang apai indai datai ke sekula ngambika berandau lalu nemu tikas pelajar bala anak sida.
PBD mega ditumbuhka dikena nyendiaka proses belajar ti ngerindangka ati lalu meri reti agi ngagai nembiak sekula ukai semina ngulihka pemutus tauka gred A aja.
Ngadaka karektor enggau pemanah ulah nembiak ba tikas ti tumu endang dikemerat kelimpah nemu ni bagi pengelemi, penegap sereta potensial nembiak sekula ngambika pengajar nemu nama pekara ti patut digaga pengudah nya ti engkeman ungkup nembiak dikena ngangkat sereta ngemanah tikas pelajar sida.
Seriris enggau Pelin Pemansang Pelajar Malaysia (PPPM) 2013-2015 dekaka nembiak nguasa dua jaku (dwibahasa) nya alai Dual Language Program (DLP) mega udah diberi kelala.
Program tu deka meri peluang ngagai nembiak sekula ngambika nguasa bidang Sains, Matematik, Teknologi Penerang enggau Rekabentuk dalam dua bansa jaku iya nya Jaku Melayu enggau Jaku English.
Beserimbai enggau nya, program ‘ibadah korban’ ti diatur Unit Pengelantang Pendiau Islam PPD Tatau enggau kerejasama Komiti Pemansang enggau Pengelikun Genturung Pendiau (JKKK) Kampung Baru sereta JKKK Kampung Dagang Tatau enggau Komiti Masjid Darul Ibadah Pelilih Tatau nya mega sama digulu Kepala Pengajar Sekula Primari (SK) Kelawit Janudin Ab Rahman, Ketua Kampung (KK) Kampung Baru Ahmad Mohktar, Shairman Masjid Darul Ibadah Anuar Sepawi, Penulung KK Kampung Dagang Tatau Awang Bujang Pengiran Runa, Penghulu Lim Tchia Hong, Kapitan Chin Khim Hee, prinsipal, bala kepala pengajar pelilih Tatau enggau peranak ti diau di kandang menua nya.
Samri mega meri besai terima kasih ngagai JKK Kampung Baru enggau Kampung Dagang Tatau nyengkaum Masjid Darul Ibadah laban udah bekerejasamaenggau PPD Tatau ngemujurka program nya ke ulih ngempung peranak sereta nyerakupka komuniti di kandang menua nya.
Iya mega ngelalau komuniti di pelilih Tatau ngambika sama mantu ngangkatka pelajar di pelilih nya seraya minta kerejasama apai indai dikena nentuka anak sida datai ke sekula ngulihka penemu sereta mantu ngangakatka pemanah ulah anak sida.