KUCHING: Penyampau orang indu ba renggat ngaga pemutus enda senipak enggau penyampau raban graduet indu ke bisi ba nengeri tu.
Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggai Pemansang Nembiak Mit, Dato Sri Fatimah Abdullah madahka perintah nengeri deka chakah ngangkatka orang indu nyadi pengaga pemutus renggat profesional enggau ke bukai.
Bepelasarka ripot Opis Statistik Malaysia, penyampau orang indu ti gawa udah nambah di Sarawak lalu penyampau orang indu nampung pelajar tinggi mega udah ngayanka trend nambah kenyau ari taun 2010.
“Enti dibandingka penyampau peratus orang indu ke gawa enggau orang indu graduate baka enda setipak.
“Nitihka Opis Statistik Malaysia, ba taun 2017 bisi 42.1 peratus pengereja pengawa kitai di Sarawak iya nya orang indu.
“Penyampau orang indu graduet tauka masuk univerisiti ari sukut peratus chukup mayuh tauka tinggi. Bepelasarka Opis StatistikMalaysia ba taun 2017 bisi 53.4 peratus graduet orang indu,” ku iya.
Fatimah bekunsi pekara nya lebuh bejaku seraya bejadi Program Latih Nyadi Ketuai Ngagai Raban Orang Indu ti diatur Opis Orang Indu enggau Ruang Bilik Sarawak (JWKS) sereta enggau kerejasama Majlis Wanita dan Keluarga Sarawak (MWKS) ba sebuah hotel ditu, kemari.
“Agenda kitai deka nyapai 30 peratus orang indu ba renggat pengaga pemutus.
“Ba Sarawak perintah kitai enda ngetu deka ngangkatka status orang indu. Kitai ngemerat sereta ngetanka penyereta orang indu dalam sektor kereja. Tu dipejalaika nengah pengawa ngenegap sereta nyendiaka sistem sukung ngagai raban tu,” ku iya seraya madahka nya siti ari kebuah JWKS enggau MWKS ngatur program nya.
Program nya digulu 20 iku pesereta ti diatur berengkah kemari (23 Julai) ngagai 27 Julai tu.
Program nya iya program pemungkal sereta deka dipejalaika baru jemah ila, ku iya seraya madahka dikena nentuka orang indu bepengelandik senggau bepenemu.
“Tuju program tu dikena ngelatih raban biak enggau orang indu ngambika ngembuan potensial ba pengawa nyadi ketuai ba mayuh renggat,” ku iya.
Sama bisi datai Sektrari Mendam KKPKWPK, Dr Saadiah Abdul Samat enggau Direktor JWKS Noriah Ahmad enggau ke bukai.