KUCHING: Opis Menteri Pengintu pengelantang Pendiau, Pengelantang Raban Bansa, Orang Indu enggau Pemansang Nembiak Mit (KKWKPK) nyadika Ripot Ketuai Audit Menua pekara ti serius sereta proses ngemetul deka dipejalaika.
Menteri iya, Dato Sri Fatimah Abdullah madah, pekara ti dirara ketuai audit nya nyadi pelasar opis menteri ngemanahka agi ari sukut chara ngaduka belanja, nitihka Treasury Instructions (TI), procurement enggau rikod reta tengkira.
Ku Fatimah, iya meri timpuh lima bulan ngagai semua ti bekaul ngaga pemetul ba semua pekara ti dipadahka opis audit menua nya.
“Kami nerima manah ripot audit tu laban tu ngayanka dini tikas kami (opis menteri) lalu udah tentu mega kami berasai enda lantang enggau tikas kami.
“Nya alai pengawa ngemetul tauka ngemanahka agi patut digaga lalu entara pekara ti patut dikereja iya nya ngemanahka kuasa ngadu, ngatur sereta ari sukut procurement.
“Mayuh pekara ti dipandangka audit, nya alai kami patut bejalaika proses ngemetul. Berengkah 25 Julai tu kami deka nentuka semua nya lalu aku meri lima bulan proses ngemetul pekara dipadahka audit, tu ngambika semua nya enda nyadi baru ila,” ku iya lebuh dikerandau pengarang berita ba pengerami bejadi Program Latih Nyadi Ketuai Raban Orang Indu ba sebuah hotel ditu, kemari.
Fatimah mansutka pekara nya lebuh dikerandau bekaul enggau Ripot Ketuai Audit Menua 2018 ti bisi bekaul opis menteri nya.
Iya madahka opis menteri, ejensi, tetiap seksyen enggau pengereja pengawa ti bekaul deka bejalaika proses ngemetulka pekara ti dipadahka opis audit nya.
Ku iya, ambika chunto lebuh nerima sereta ngaduka reta tengkira, ngaga inventori, pengulih dibagi mit enggau ke bukai mesti nitihka TI, baka ti disebut audit.
“Jaku rara ari audit diterima, ngarapka enda nandu pengilap, pemesai ti bekaul patut belajar ari pengilap ke udah nyadi lalu kitai (opis menteri) patut terus mansang ke mua.
“Aku meri meri awak ngagai opis menteri, pengereja pengawa ti megai tanggungpengawa nya matau pekara tu, kitai mesti chakah bejalaika proses matau ngambika semua prosedur tauka atur nitihka peminta TI,” ku iya.
Nyempulang Fatimah lebuh dikerandau raban pengarang berita, Sekretari Mendam Opis Menteri iya Dr Saadiah Abdul Samat enggau Direktor Opis Orang Indu enggau Ruang Bilik, Noriah Ahmad.