LONG SAN: Perintah nengeri ngungkupka bantu urung RM10 juta ari baruh inisiatif Ejensi Pemansang Tanah Tinggi (HDA) ti udah dikemendar dikena ngaga projek sistem bekal ai kediri empu di Long San.
Nitihka penerang Kaban Kunsil Nengeri Telang Usan Dennis Ngau, projek tu udah dikemendarka ba rintai projek lalu diatu benung dalam proses ngaga nya.
Ku iya, sistem tu ulih ngangkatka bekal ai ngagai peranak ba kandang menua Ulu Baram kelebih agi Long San.
“Projek sistem bekal ai tu beungkus enda kurang ari RM10 juta patut dipejalaika ba taun tu.
“Kedeka aku projek nya dipejalaika enggau lengkas tang sistem tu begunaka pansik ke silik ngambika lebuh udah ditubuhka ila, nya ulih ngeluarka bekal ai ti endang diguna amat,” ku iya lebuh bejadika Pengerami Lumba Main ke-52 Sekula Primari (SK) St Pius ditu, bedau lama ti udah.
Dennis madahka sekeda rumah panjai ba kunstitusyen iya udah dikemendarka ungkup renggat keterubah sistem bekal ai.
“Sistem bekal ai tu keterubah deka dipejalaika ba kandang menua Telang Usan.
“Aku ngarapka maya sistem tu udah tembu ila, ai tu deka ulih nangkup guna ai ti endang diguna peranak Long San enggau kandang endur bukai mega baka kededua sekula perintah sereta klinik,” ku iya madah.
Dennis mega ngelalau ketuai komuniti, bala tuai rumah enggau bala penguasa sekula betemu enggau orang ke mangku pengawa projek lebuh sida datai ngagai kandang menua nya minta sida ngungkupka sekula ba sistem sida ngambika ai ulih disambung ngagai sekula primari sereta sekula sekondari udahnya.
Ba pengerami nya mega, Dennis nyemetak madah aktiviti lumba main tauka ko-kurikulum nya beguna ba pemansang modal mensia.
“Kelimpah ngulihka penemu ba dalam kelas, aktiviti ko-kurikulum ke bakatu mega beguna amat.
“Aku amat temegah ati enggau sukung sereta kerejasama ari apai indai, komuniti sereta bala ketuai ba pengawa ngemansangka raban bansa,” ku Dennis nambah iya gaga ati laban diperatika SK St Pius nya sekula primari ke pemadu mayuh nembiak sekula di Telang Usan ke meri sida pengelebih ba ngatur mayuh bengkah aktiviti sekula. Aku ngarapka Opis Pelajar Sarawak ulih berundingka Sekula St Pius nyadi sekula besai di Baram, ku Dennis.
Dennis mega ngelalau bala nembiak sekula nguna awak sida di sekula enggau memanah dikena ngemansangka pelajar sida lalu enda nangi napi pemar di sekula ngambika ulih ngangkatka tikas pelajar sekula sida enggau manah agi.
“Enti sema dia nadai pekit, tentu deka pedis ba sida deka ngemansangka diri empu. Nya alai, guna meh pemaik awak tu dikena ngiga penemu lalu ambi pelajar sekula ke pemadu manah di sekula. Ransingka belajar enggau fukos ba pelajar nuan tauka sebarang aktiviti ba sekula nuan,” ku iya nambah.
Entara program pengerami lumba main ke bisi diatur iya nya futsal, bol keranjang, sepak takraw, bola tampar, badminton, bola baling, ping pong kelimpah program belanda ke bukai sereta aktiviti ke ngelantangka ati ungkup pra-sekula.
Pengerami tu mega dikena milih atlet ke bisi potensi ba pengerami Lumba Main Zon Ulu Baram ti deka datai ila. Ba tuju pengawa tu, Dennis mega udah meri bantu RM10,000 ngagai sekula nya.
Ketuai presiden gerempung apai indai enggau pengajar SK St Pius Christopher Igau,Sapit senior (ko-kurikulum) Day Bee Doming, Ketuai Komuniti Long San Lucia Paya enggau Prinsipal SMK Datu Temenggong Lawai Jau Long San, Richard Emang entara sekeda bala temuai ti dipebasa ke bisi datai ngulu pengerami tu.