Anda di sini

Duit injau kontra deka dikerandau enggau MoF, MoE

KUCHING: Opis Menteri Pelajar, Sains enggau Pansik Teknologi dipelaba deka ngatur siti aum begulai enggau Opis Menteri Wang (MoF) sereta Opis Menteri pelajar (MoE) bekaul enggau duit injau kontra sepenyampau RM1 bilion.

Menteri opis nya, Dato Sri Micheal Manyin Jawong madah, aum nya dipelaba deka diatur minggu baru pasal isu ti bekaul kelebih agi pasal ngemanahka sekula repuk di nengeri tu.

“Kami udah nerima surat rasmi ari Opis Menteri Wang lalu perintah nengeri udah nyaut.

“Ke diatu opis menteri aku dalam perambu deka ngatur siti agi aum enggau pemesai ari kededua, Opis Menteri Wang enggau Opis Menteri Pelajar, ke dikearapka ulih mutarka isu tu,” ku iya.

Iya mansutka pekara nya lebuh dikerandau raban pengarang berita pengudah ngulu pengerami bejadika Festival MIND & STEM ba Sekula Sekondari Chung Hua No.1 Kuching ditu, kemari.

Manyin ti optimis nengah aum nya ila ulih mutarka semua isu, taja pia enggai dulu madahka pekara nya ngagai surat berita.

Ku iya, manah agi pengawa mutarka nya diputar nengah chaara duduk begulai berandau lalu ukai ngagai media kelimpah ari gaga nyadi politik.

“Aku lebih milih duduk begulai mutarka pekara tu lalu kitai enggai ngaga pekara pelajar nyadi pekara politik laban ti tusah ila nembiak kitai,” ku iya.

Kelimpah ari nya kena 7 Julai apin lama, Kepala Menteri Datuk Patinggi Abang Johari Tun Openg madahka perintah Sarawak udah berandau enggau perintah besai pasal perambu injau kontra sepenyampau RM1 bilion.

Iya madahka lambar ti deka meri RM1 bilion nyadi bayar kontra ngagai duit injau perintah nengeri sepenyampau urung RM2.4 bilon ke bendar iya udah disetuju kededua piak.