MIRI: Projek ngaga sepital baru Miri deka dilengkas ari timpuh ke udah ditetapka, pia ku Kaban Parlimen (MP) Miri Dr Micheal Teo.
Teo madah, sepital nya ila iya nya ti keterubah di Malaysia ke ngembuan lebih 300 katil.
“Aku bebendar madah ngagai Menteri Pengerai iya nya penanggul (orang sakit ti dedat) udah betaun nyadi lalu aku deka madahka berita manah iya nya projek tu deka laju agi digaga ari timpuh ke udah ditetap. Pengawa bejalaika projek nya deka berengkah enda lama agi,” ku iya nerang.
Iya madah munyi nya ba pengerami Gawai Raya begulai enggau 12 ejensi perintah di Wisma Persekutuan Fasa Dua di Lopeng pagi kemari.
Ku Teo madah, peminta deka ngembuan sebuah sepital baru ditu suah nyadi sebana rayat ngagai iya.
Nya kebendar dikena mutarka penanggul pemayuh pesakit ari dalam enggau luar Miri ba sepital sereta klinik pengerai.
“Sepital enggau poliklinik (klinik pengerai) kitai majak ditemu laban ti suah dedat dalam betaun ti udah nyentukka bisi ke sanggup datai sepenumu pukul 4 pagi laban ti deka beperesa,” ku iya nerang.
Bekaul pengerami nya, Teo madah, nya entara chara dikena ngenegapka penyerakup pupu bansa dalam rayat kelebih agi staf di Wisma Persekutuan.
Aktiviti nya udah dikemujurka Opis Perangkaan, Opis Pemansang Komuniti (KEMAS), Opis Penyerakup Menua enggau Integrasi Nasional (JPNIN), Opis Pengerejister Gerempung (ROS), Raban Penyaga Pengelikun Mensia Mayuh (APM), Opis Nagang Penyalah Makai Suap Malaysia (SPRM), Opis Ngeli Miri, Kaunsil Lisin Perengka Pengangkut Dagang (LPKP), Opis Nyukat enggau Ngaga Kar, Opis Koperasi Malaysia Bagi Menua Miri/Bintulu, Opis Luya Menua sereta Ambang Wira Sdn Bhd.
Teo mega bisi madahka geran RM5,000 ungkup komiti pengatur, lalu pengerami nya udah dirichahka enggau program karaoke sereta nyabuty tikit benasit.
Sama bisi datai Penulung Direktor Survei Opis Nyukat enggau Ngaga Kar Malaysia ke mega nyadi Chairman Komiti Nyaga enggau Nyeruri Begunana Gunasama Persekutuan Fasa Dua Simeon Dewal Mail, Pemesai Penyerakup Miri ke mega Chairman Pengatur Giri Nyareng enggau Chairman Komiti ‘Kawasan Rukun Tetangga’ (KRT) Kuarters Gunasama Persekutuan Noni Nadhirah Zailani.