Anda di sini

Peminta ngadu ke jalai udah dikenataika ngagai JKR - Wilson 

DEKA DIADU: Sebuah entukar 4WD benung niti batang ngelayang ke seberai baka ba video ke diayan ba Facebook, kemari.

Dikarang Judan Bungap

SIBU: Kaban Kunsil Nengeri (ADUN) Pelagus Wilson Nyabong Ijang udah minta Opis Kereja Raya (JKR) ngaduka jalai ari SK Nanga Pelagus ngelawa Rumah Jalit, Pasir Nai, Pala Wong di Pelagus.

Wilson madah kelimpah udah bepadah ngagai JKR, iya mega kala nulis surat minta kompeni ngereja kayu ti semak nyaup ngaduka dulu jalai nya.

"Penusah tu udah dipadah aku ngagai JKR ngambika sida nyendiaka puku dulu dikena ngaduka jalai nya.

"Pia mega, kompeni ngereja kayu sebedau tu udah besetuju ngaduka jalai nya tang nyentuk ke sehari tu empai digaga," pia ku iya madah ngagai pengarang berita, sehari tu.

Kemari, mensia mayuh nengah laman rama Facebook bekunsika siti video sebuah entukar 4WD niti batang ngelayang ke seberai.

Ba video nya, entukar 4WD nya dipeda begadai kelimpah bisi mega dipeda orang bukai nyaup deriba beratika batang ke dititi.

Nambahka jaku iya, ku Wilson, dalam kandang minggu tu mega iya deka mai bala JKR ngelawa palan nya nentuka penyampau belanja dikena ngaduka jalai tauka jematan nya.

"Belanja ke dikena ukai seratus dua. Bejaku aja senang tang kami ke nyadi pengari rayat naka penyampat mutarka penusah baka tu," ku iya madah.

Jalai tauka jematan ke jai tu ditengah enam buah rumah panjai iya nya Rumah Jalit di Pasir Nai, dua buah rumah di Nanga Pelagus iya nya Rumah Bujah enggau Rumah Kaya enggau tiga buah rumah di Nanga Benin iya nya Rumah Achong, Rumah John Ason enggau Rumah Belaja.

Kelimpah ari nya, jalai tu mega ngelawa SK Nanga Pelagus enggau SK Nanga Peraran.