SIBU: Sistem pelajar menua tu patut dipansik agi dikena nyendiaka pelajar ke manah ngagai nembiak sekula enda ngira di mengeri tauka menua pesisir.
Kaban Parlimen (MP) Lubok Antu Jugah Muyang madah, iya ke nyadi kemaya hari tu, nembiak ti datai ari ruang bilik pemisi deka mujur agi sekula.
“Sida nadai bepenanggul nganjung anak ngagai sekula ke manah agi ti mar bayar tauka nganjung anak tuisyen sereta ngaji orang ngajar di luar kelas.
“Tang tu enda ulih disediaka apai indai ti kurang penatai pemisi kelimpah semina ngandalka anak belajar di sekula aja.
“Ketegal nya, menua tu meseti bisi sistem pelajar baru iya ke mai pemanah ngagai semua enda ngira sekula di mengeri tauka menua pesisir,” pia ku iya madah maya pengerami ‘Hi-Tea’ beserimbai enggau Hari Pengajar di SK Engkilili No 2 di Lubok Antu, kilah ensana.
Bekaul enggau pengerami sehari nya, Jugah madah, Hari Pengajar ke diintu ninting 16 May ukai semina hari pemadu ‘berega’ ngagai bala pengajar tang meri awak ngagai mensia mayuh mantaika basa enggau pengaga ati ngagai pengajar.
Ku iya, enda ngira dini alai sekula pengajar ngajar, semua sida ‘berega’ laban sida nempa nembiak nyadi orang beguna.
“Kena 16 May ninting taun kitai ngintu hari pengajar.
“Ba bala pengajar, maya tu hari ‘berega’ ngagai sida tang ba kitai, tu mih awak dikena ngayanka diri bebasa sereta ngenang budi pengajar,” pia ku iya madah maya pengerami ‘Hi-Tea’ beserimbai enggau Hari Pengajar di SK Engkilili No 2, kila ensana.
Jugah madah, pengajar ke nyanggup gawa di sekula menua pesisir patut dipuji.
“Sida betapi enggau macham penguji tauka penanggul tang semua nya enda dikira laban deka meda anak kitai mujur ba sekula.
“Nya alai, pengeransing bala pengajar tu meseti dikenang kitai,” ku iya madah baru.
Dikena nimbal nya, ku iya, apai indai mega meseti ransing nyengulaka anak sida.
“Pemujur pelajar nyadi reta pemadu berega ngagai anak kitai.
“Semina pelajar aja jalai muntan dikena ngubah tikas pengidup ruang bilik,” pia ku iya madah.
Ba pengerami nya, Jugah bisi nyuaka bantu RM20,000 ngagai SK Engkilili No 2 dikena ngemanahka perengka guna enggau belanja nembiak ngatur program.