KUCHING: Kesatuan Guru Bumiputera Sarawak (KGBS) nyukung penuh perambu Opis Menteri Pelajar Malaysia (KPM) ti deka meri insentif ngagai pengajar ke bisi ‘Ijazah Lanjutan’ enda ngira Sarjana tauka Falsafah Kedoktoran.
Presiden KGBS, Ahmad Malie madahka perambu nya enti nyadi nyata ulih ngenukuka penyulut sida ti nyambung pelajar ngagai renggat tinggi maya meri servis sebedau tu.
Perambu meri insentif nya dibantaika Menteri Pelajar Dr Maszlee Malik maya pengerami Hari Pengajar Renggat Nasional ba Pulau Pinang apin lama.
“KGBS nyukung penuh perambu tu laban tu endang siti pekara besai ti dipinta gerempung-gerempung pengajar ngelama tu, ti lama betangguh nyentuk diatu.
“Nya alai, lebuh YB Menteri madahka perambu tu, KGBS meda KPM udah berengkah muka lambar barumeda semua rasionalisasyen nama kebuah gerempung-gerempung pengajar minta iya nya ngambika pengajar diberi insentif dikena ngenuku sida ti udah nyulut bulih Ijazah Sarjana enggau Ijasah Falsafah Kedoktoran maya servis sida sebedau tu,” ku iya madah ngagai Utusan Borneo.
Ahmad ngarika KGBS ngarapka YB Menteri Pelajar nya ulih ngamatka perambu nya dalam timpuh ti semak tu.
Laban ku iya, perambu nya udah kelalu lama betangguh.
Entara perambu gerempung-gerempung pengajar sebedau tu iya nya meri insentif nengah chara nikika gaji tauka gred nyadika insentif ngagai pengajar ti udah nembuka pelajar sida.
“KGBS mega madahka perambu tu nyadi siti pemeri enggau perais ti besai ngagai semua pengajar nyema YB Dr Maszlee ulih ngamatka perambu tu,” ku iya.
Bepelasarka ripot Bernama di George Town kena 16 Mei tu tadi, Opis Menteri beperambu deka meri insentif ngagai pengajar ti nampung pelajar ngagai tikas Ijazah Sarjan enggau Ijazah Kedoktoran.
Menteri Pelajar, Maszlee madahka opis menteri deka ngatur randau enggau Opis Servis Mensia Mayuh (JPA) pasal perambu nya.
Iya mega madahka diri deka minta tulung Menteri Besai Tun Dr Mahathir Mohamad pasal perambu nya.
Kelimpah ari nya Maszlee mega madahka opis menteri udah ngerintai tauka ngelangkar beberapa inisiatif timpuh pandak enggau panjai dikena nambahka tangggungpengawa bala pengajar ba sekula.