SRI AMAN: Taman Negara Gunung Lesong ba Lingga, Sri Aman ulih dikemansang lalu ngangkatka agi tikas ekonomi rakyat tu ke lalu ulih dikena ngerembaika produk eko-dagang temuai ba kandang menua Sri aman.Taman Negara Gunung Lesong iya nya siti produk tambah ke ulih nambahka penyampau temuai enda ngira ari dalam tauka luar Sarawak ke datai ngelawa ngagai kandang menua Sri Aman.
Kelimpah ari nya, pemayuh macham produk eko-dagang temuai ba kandang menua Sri Aman deka ngerembaika ekonomi menua baka ari sukut perengka pengangkut, endur diau enggau pemakai.
Sapit Residen Sri Aman, Crispin Francis ke nyadi pengari Residen Sri Aman madah munyi nya lebuh bejaku ba Pengerami Nutup Woksyop ‘Gunung Lesong National Park Multidisciplinary Assessment and Management Plan’, Sri Aman bepalan ba sebuah hotel ti besai ditu.
Iya mega ngarapka ari woksyop ke diatur tu tau nyadi pelasar entara Raban Opis Kampung enggau peranak menua pesisir muka sereta ngangkatka kaul kerejasama diri kelebih agi ngerembai lalu nyeritaka sejarah Taman Negara Gunung Lesung dikena muka peluang kereja.
“Ambika chunto,menua pesisir bisi peluang bulih penatai pemisi ke bukai ngena chara servis malin datang temuai, ‘homestay’, kedai makai, asil pengeladik jari enggau mayuh agi,” ku iya.
Kelimpah ari nya, Penyaga Kampung Opis Kampung Sarawak, Noraini Johari madah maya pengerami nutup woksyop tu, taja Taman Negara Gunung Lesong semina mesai 595 hektar tu mega siti ari Taman Negara ti paling mit ba Sarawak tang taja pia nya mayuh ngundan penyelai reti pengidup enggau gaya penarit diri empu.
“Tu siti ari tempat diau sereta sarang jelu siga ke endemik ba Pulau Borneo baka Orang Utan enggau Langur Merah,” ku iya.
Nambahka nya mega, ba asil pansik enggau penemu ke udah dipansut ari mayuh macham bidang pemansik ba Taman Negara Gunung Lesong ke udah dipejalaika sida UNIMAS pengelama timpuh setaun lebih udah disegulai maya woksyop nya lalu bulih sambut ke manah ari penyereta bengkel.
Berindik enggau nya, woksyop ‘Gunung Lesong National Park Multidisciplinary Assessment and Management Plan’ diatur pengelama dua hari enggau penyampau 55 iku penyereta ari ejensi perintah, opis menteri enggau ketuai komuniti ari pelilih gunung Lesong.
Bisi tiga licha maya woksyop tu nyengkaum sesi berandau keterubah iya nya ‘Final Report Gunung Lesong Nasional Park Multilidisciplinary Assessment and Management Plan’ ari Dr Qammil Muzammil, Pengelicha UNIMAS.
Sesi licha ke dua iya nya Merambu Pemansang ba Taman Negara Gunung Lesong ari Injinir Opis Kampung Sarawak, Abang Nuradzizi Abang Bolhi.
Licha ketiga tu bekait enggau Penumbuh Gunung Lesong Community Based Eco Tourism (GLCBET) ari Victor Luna, Menijer Eko-Dagang Temuai ari Sarawak Forestry Corporation ti nyadi chairman Gunung Lesong Community Based Eco-Tourism (GLCBET).