KUCHING: Raban biak Sarawak diperansang mekuh ngagai pengawa ngulihka pengelandik enggau penemu ngambika sama ulih meri sukung ngagai pemansang rama enggau menua lalu ukai semina pemandai ba keretas.
Menteri Pelajar, Sains enggau Pemansik Teknologi, Dato Sri Michael Manyin Jawong madahka laban pemandai ba atas keretas enda ulih nyamin bulih pengawa dikena napi ubah peminta markit.
Ku iya, apai indai patut ulih nentuka anak ukai semina bulih pemandai ba atas keretas aja tang patut ulih ngenukuka anak nya bulih kereja pengudah tembu belajar ba Pom 6 tauka pansut ari tikas universiti.
“Ba menua barat nadai orang meda sekalika nuan bisi Master tauka PhD lebuh maya nuan minta kereja. Orang diatu dibayar bepelasarka sukung sida.
“Sida enda meda bepelasarka pemandai ba atas keretas tang sida deka nemu nuan sekalika ulih meri sukung nengah penemu enggau pengelandik,” ku iya.
Manyin mansutka penemu iya nya lebuh bejaku ba pengerami Hari Pengajar Renggat Nengeri Sarawak Ke-48 ti diatur ba Dewan Suarah Sri Aman, kemari.
Pengerami nya ti ngena rambai jaku ‘Guru, Obor Hemah Menyinari Pertiwi’ mujur dipenyadika Kepala Menteri Datuk Patinggi Abang Johari Tun Openg.
Nambahka nya Manyin mega ngansak pengajar enggau apai indai ngambika mantu nempa pengerindu dalam subjek Sains, Teknologi, Injiniring enggau Matematik (STEM) ngagai bala anak tauka orang biak.
“Penyulut Sarawak dalam STEM, baruh. Taun nyin kemari bisi 23.2 peratus, diatu bisi urung 24 peratus nembiak ke ulih nampung ba Pom 4 dalam aliran Sains.
“Lebuh datai ba Form 6, nya deka majak kurang, sereta lebuh datai ba renggat universiti semina tinggal 10 peratus aja, enti pekara tu nyadi kitai engka enda ulih betapi enggau Revolusyen Industri 4.0,” ku iya.
Nyerumba hari pengajar nya, Manyin ngelalau bala pengajar di Sarawak ngambika ulih ngangkatka pengelandik enggau pemandai sida dalam Jaku English (BI) awakka ulih nyikap nembiak ngena jaku nya dikena betapi enggau ubah ke nyadi diatu .
Iya madahka BI endang nyadi kereban tauka jaku penyambung ti dikena di serata dunya sereta nya alai amat beguna bala raban nembiak Sarawak landik sereta pandai BI awakka ulih besemekih ba renggat dunya.
“Raban nembiak Sarawak deka bisi peluang ti tinggi agi sereta mujur ba renggat dunya, enti bisi pengelandik enggau pemandai ba BI,” ku iya.