KUCHING: Sapit Kepala Menteri Datuk Amar Douglas Uggah Embas udah ngenukuka ukai nyeliahka diri ari nyaut tanya Kaban Kunsil Nengeri Pending, Violet Yong sentang stesyen nupi chapi di Australia lebuh iya ke diselepak maya benung bejaku ba Aum Kunsil Nengeri(DUN),kena Hari Empat tu tadi.
Dalam penerang ti dipansutka iya nengah pemesai pekara berita iya Edward Subeng, nya nerangka Uggah benung bejaku nyimpul jurai Opis Menteri Betanam Betupi Moden, Tanah Adat, enggau Pemansang Kndang Menua lebuh Yong lalu nyerak bejaku nuduh iya ‘makai angin’ di Darwin.
“Iya ngena awak nya nuduh Uggah udah raun (kemisi raun) maya pejalai ke menua tasik ba tanya iya. Uggah madah ngagai Violet ke alai iya semina nyaut tanya nya enda iya matak baru jaku tuduh nya.
“Speaker DUN Datuk Amar Mohamad Asfia Awang Nassar udah setuju enggau iya sereta minta Yong matak jaku tuduh iya. Lebuh iya enggai,Uggah mega enda nyaut tanya iya,” ku penerang nya.
Penerang nya nambah, basa enggau disiplin beguna amat maya ba DUN sereta patut ditanka ngambika kaban dewan nya enda ngena sebarang jaku ti nadai atur maya aum DUN.
Berebak enggau nya, Uggah udah nerima Penemuai basa raban ari Gerempung Buddha Malaysia ba opis iya kemari,ti diuluka chairman gerempung nya,Dato Sri Dr. Tay Chin Kin.
Nengah awak nya,Tay enggau basa udah ngagauka Uggah datai bejadi pengerami maya hari ngintu Hari Wesak ba premis nya ba Jalai Wan Alwi,ditu.
Ungguh dikangau nengah kapasiti iya ke nyadi menteri nguasa Unit Ungkup Jalai Pengarap Bukai (Unifor), siti unit ba Opis Kepala Menteri ti meri bantu enggau belanja ungkup pemansang jalai pengarap ukai Islam di nengeri tu.
Ku Tay, germpung nya bisi ngangauka bala pengari ari jalai pengarap bukai ngulu pengerami nya.