KUCHING: Siku konsultan deka dichiri dikena bejalaika pansik bekaul enggau mayuh aspek dalam Kort Bumiputera Sarawak.
Pekara nya dipadahka Sapit Kepala Menteri, Datuk Amar Douglas Uggah Embas maya baum Kunsil Nengeri (DUN) hari ke-8, ensana.
“Perintah benung dalam proses nyirika siku konsultan dikena bejalaika pansik ti deka mungkur mayuh aspek Kort Bumiputera baka struktur enggau organisasyen, operasyen enggau pengawa ngintu, bidang kuasa khas enggau ubah ngagai Ordinan Kort Bumiputera 1992.
“Asil pansik tu deka nyadi pelin besai enggau pelin bejalaika pengawa ti diasuh dikena ngatur struktur baru enggau ‘elevation’ Kort Bumiputera Sarawak ke diatu kelebih agi bekaul enggau struktur organisasyen enggau pengereja pengawa, kuasa khas enggau bidang kuasa bekaul tanah adat, undang-undang enggau adat, sereta pengulih organisasyen sereta pengawa nusun penerang digital sistem Kort Bumiputera.
“Pansik nya begunaka timpuh semilan (9) bulan endur ditembuka,” ku iya nyerumba nyimpul jurai jaku Opis Menteri Betanam Betupi Moden, Tanah Adat enggau Pemansang Kandang Menua.
Ngenang pasal Kort Bumiputera Sarawak, iya madahka kort nya relevan sereta ulih dikena urung 70 peratus peranak nengeri tu.
Ku iya, kitai benasit manah sereta beterima kasih ngagai Kepala Menteri Datuk Patinggi Abang Johari laban ti ngaku enggau ngemeratka pemesai guna Kort Bumiputera ti deka ngatur enggau lurus pasal penyarut tanah NCR sereta mega adat ba orang Bumiputera.
“Peminta Kepala Menteri ti deka ke kitai bejalaika pansik komprehensif dikena ngubah Kort Bumiputera endang siti chara ti pintar enggau manah.
“Laban nya deka ulih nentuka Kort Bumiputera mengkang relevan ngagai komuniti Bumiputera maya betapi enggau pemar diatur enggau jemah ila, lebih agi pemar asil ari pemansang ti nadai ngetu di menua pesisir enggau ekonomi digital,” ku iya ti mega Menteri Betanam Betupi Moden, Tanah Adat enggau Pemansang Kandang Menua.