KUCHING: Nadai siku ukui lelang dikelaung ari dipindahka dalam Operasyen Anti Rabies Pelilih Menua Kuching ti berengkah dipejalaika 22 April ngagai 3 Mei tu.
Sapit Kepala Menteri, Datuk Amar Douglas Uggah Embas ti mega Chairman Komiti Mutarka Penusah Ngenyit madah, enti dikelaung nya semina deka ngemuntanka pengawa napi penyakit ke ulih nabanka nyawa.
Bejaku pengudah nyadi chairman aum pasal program ngatur igi penyakit rabies ditu kemari, Uggah irau bisi peminta dikelaungka baru pengudah tu.
“Perang tu dipejalaika ngagai rabies lalu ukai ngagai ukui ti ditupi. Kitai patut mindahka ukui lelang sereta mayuh agi ukui tupi diberi vaksin.
“Ba operasyen ke deka datai tu, ukui ke dalam kandang rumah pengempu ukui enda deka kena keruga.
“Kitai ngarapka pengempu ukui ke bedau meri vaksin ngagai ukui sida patut lengkas meri vaksin nya,” ku iya.
Aum nya bisi digulu, Sarawak Society for Prevention of Cruelty to Animals (SSPCA) ti betuaika presiden iya Datin Dona Drury Wee enggau Serakup Save Our Strays (SOS) Kuching betuaika presiden, Kitty Chin.
Nambahka nya, Uggah madah kenyau ari rabies ngelekai, nya udah nabanka 16 nyawa lalu iya enggai agi bisi nyawa bukai kena penusah nya.
Ku iya ba operasyen nya ila, Pelilih Menua Kuching deka dibagi ngagai lapan zon lalu iya meransang pengempu nganjung ukui dituchuk vaksin anti rabies ba palan vaksin ke dibuka nitihka zon.
Ngenang pasal jaku tuduh ti m adahka raban operasyen tama ke rumah ngambi ulih ngenyinakka ukui, Uggah madahka pansik udah dipejalaika.
Tang ku iya, pekara ke amat nyadi iya nya ukui ti dijinakka ba tisi jalai tang lalu lari tama ngagai kandang rumah ti ngujungka raban nya tama ngagai kandang rumah awakka ulih mindahka ukui nya.
“Raban operasyen ke sekali tu deka mai pom ngambika disain pengempu rumah dikena ngulihka pemendar ngambi ukui ti ditagit lari ke dalam kandang rumah,” ku iya ngambika nadai orang ngaga operasyen nyadi politik.
Uggah mega minta mensia mayuh ngambika anang irauka raban penyaga ke mai senyata M16 sida.
“Senyata M16 ti dibai raban penyaga nya dikena nyaga pengelikun sida ke gawa aja sereta ukai dikena nimbak ukui.
“Naka ke diatu nadai seleka peluru ti udah dikena nimbak ukui.” ku iya.
Pengudah penyakit tu diaku nyadi penusah ngenyit, Ejensi Mutarka Penusah Ngenyit Menua (NADMA) udah mai raban polis nyadi ketuai operasyen.
Kuala Lumpur mega udah meri duit sepenyampau RM8.9 juta dikena nambahkka lebih RM22 juta ari Perintah Nengeri.
Opis Veterinar perintah besai meri bantu nengah 56 pengereja pengawa veterinari kelimpah ari nyendiaka vaksin ukui enggau kereban bukai.