Anda di sini

Produk bepelasarka biodiversiti ngembuan rega komersial ti tinggi

 Cathrine Joolly, 23 (kanan) enggau Doris Teo, 65, bansa Kelabit ari Pa’ Lungan, Bario mandangka sekeda ri produk LitSara maya pengerami nyain BSA, kemari.
ASAL: Cathrine Joolly, 23 (kanan) enggau Doris Teo, 65, bansa Kelabit ari Pa’ Lungan, Bario mandangka sekeda ri produk LitSara maya pengerami nyain BSA, kemari.

KUCHING: Palan Biodiversiti Sarawak (SBC) deka mekuh ngagai pengawa mansik pemansut biologi di nengeri tu awak ke ulih ngasilka lebih mayuh produk ti bepelasarka biodiversiti ke ngembuan rega komersial ti tinggi.

Chairman SBC Tan Sri Datuk Amar Wilson Baya Dandot madah, ke tuju nya SBC sedia bekerejasama enggau kompeni peribit nyengkaum pemeranak puku enggau pemansik ari dalam enggau luar menua.

Nitih ku iya kerejasama entara SBC enggau kompeni peribit , pemansik enggau pemeranak puku beguna amat dikena ngerembaika agi ekonomi biodiversiti nengeri Sarawak.

“Kitai udah mujur ngasilka produk pengerai berega tinggi ti bepelasarka utai tumbuh asal ke bisi ba tanah tinggi Sarawak iya nya ‘Litsea Cubeba’.

“Aku ngarapka kitai ulih ngemansangka agi sektor ekonomi biodiversiti Sarawak...Sektor ekonomi betanam betupi enggau industri ba nengeri tu udah bisi tang sektor ekonomi biodiversiti bedau agi tentu dipeda,” ku iya.

Iya mansutka pekara nya lebuh bejaku ba Pengawa Nyain Sempekat Bekunsika Pemaik (BSA) entara SBC enggau lima komuniti asal Sarawak ungkup Projek Litsara di SBC ditu, kemari.

Lima komuniti asal iya nya Bidayuh ari Kampung Kiding, Padawan, Lun Bawang ari Long Telingan enggau Long Kerebangan, Lawas enggau Kelabit ari Pa’Lungan enggau Pa, Ukat, Bario.

Projek LitSara berengkah dipejalaika SBC begulai enggau lima komuniti asal nya kenyau lima taun ke udah ti ngena utai tumbuh babas, Litsea Cubabe tauka dikelala enggau nama ‘Pahkak’ ba bansa orang Bidayuh enggau ‘Tenem’ ba bansa Kelabit enggau Lun Bawang.

Asil pansik ti digaga SBC ti dichampurka enggau penemu asal (TK) komuniti peribumi nya udah mujur ngasilka beberapa produk pengerai chap LitSara baka syampu, gel mandi, sabun ari utai tumbuh asal enggau minyak pati LitSara.

Bekaul enggau sempekat nya, Wilson madahka pengawa nya ti pemadu besejarah ngagai sida SBC enggau Kaunsil Sarawak Biodiversiti kenyau iya ditumbuhka 21 taun ke udah.

“SBC sehari tu (kemari) nempa pengawa besai lebuh nyain Nyain Sempekat Bekunsika Pemaik  (BSA) enggau lima komuniti asal ari baruh Ordinan Palan Biodiversiti Sarawak 1997,” ku iya seraya madahka sempekat tu mega nyadika Sarawak nengeri keterubah ba Malaysia bejalaika Protokol Nagoya.

Wilson madah, chara pemadu manah dikena dalam BSA iya nya ngaku enggau bebasaka hak komuniti ba pemansut biologi enggau penemu asal (TK) ti bekaul, nentuka bekunsi pemaik ti lurus sereta endan besiping ari sukut duit tauka ukai duit asil ari ngena pemansut biologi enggau penemu asal sereta ngelakuka pemai guna nyaga biodiversiti.

“Pengawa nyain sempekat BSA tu nyendiaka jalai ke ulih mai pengaya nengah aktiviti sosio-ekonomi alternatif ke mungkur penyereta komuniti asal,” ku iya.

Kelimpah ari nya ku iyam sempekat nya senipak enggau visyen perintah nengeri Sarawak ti berubah ari industri asal sereta nyerungkai pemansut ti mai penumbuh ekonomi alternatif baru nengah sains enggau teknologi.

Iya madahka enggau nya Sarawak bulih penguntung landskap nengeri tu ti kaya enggau sumber biologi.

Kelimpah ari nya, Ketua Pemesai Eksekutif SBC Dr Yeo madahka gempung tegap entara TK enggau pemansik etnobotanical ulih muka peluang ekonomi baru.

Nitihku iya, nyanyata dipeda nenah pengerembai industri pengerai dunya ti berega US$3.7 trilion, tiga kali lipat lebih besai dibandingka enggau industri farmaseutikal.

“Nya alai, amat beguna ba Sarawak ngelindung tauka nyaga pengawa pemansut biologi.

“SBC bejalaika program dokumentasyen TK enggau tuju ngenegapka agi komuniti pasal Sarawak nengah pengawa ngaku ti manah agi ngagai hak enggau akses sida ba penemu,” ku iya.