KABONG: Keterubah nya Kelab Mutusikal Kabong Bikers enggau kerejasama LC Crew Sarawak Sibu (LCCSS) udah ngatur 1st Kabong Mini Bike Gathering (1st KMBG) beserimbai enggau Karnival Gudi Antarabansa Kabong Kali Ke-3 ti diatur ba Pantai Tanjung Kembang di Kabong kena 8 nyentukka 10 Mac tu diatur Mohammad Yusup Zakaria ke nyadi pengatur program.
Program tu nerima sambut ari 41 buah kelab mutusikal ari selampur nengeri Sarawak lalu sama mega disereta kelab mutusikal ari Sabah.
Nengah program tu, nya udah mujur ngempuruka lebih 400 kelab mutusikal bemacham model ke sama bisi dipandangka ngagai mensia mayuh.
Batang tuju program tu iya nya bepelasarka pengawa ti deka ngasuh mensia mayuh mereti iya nya raban ‘bikers’ ngembuan tikas disiplin ke tinggi dalam ngintu perengka pengangkut sida lalu dikena ngerichahka agi Karnival Gudi Antarabansa taun tu.
Kelimpah ari nya, raban pengatur program mega bisi nyediaka seruyuk bejual gari, ‘sticker’, kereban mutusikal enggau mayuh agi ari bemacham kelab mutusikal ungkup bala pengusung ti ulih dijadika tepa pengingat sereta sama mega bisi diatur pengawa nyabut tikit benasit ke bisi meri perais baka kereban mutusikal baka tupi keledar, sarung jari, jaket ti ulih mantulka api enggau mayuh macham agi.
Tetiap kelab ti datai sama bisi peluang nyereta pekit Club Gathering, pekit Slow Ride Kapcai, pekit Slow Ride Big Bike enggau mega pekit Bike Autoshow ke dibagi ngagai 11 kategori.
Entara nya Best Cub Standard Open, Best Cub Modified, Best Classic Open, Best Scooter Open, Best Sticker Open, Best Paintwork, King of LC 135, King of Y15, King of NVX/NMAX, King of Yamaha Lagenda sereta King Of the King ke udah nerima penyereta ti mayuh ke ulih nyadi palan endur psereta mandangka penyeai mutusikal sida lalu pemenang mega bisi bulih mata duit, trofi enggau setipikit.
Muakka lemai, pengawa bejadi 1st KMBG udah dipenyadi Kaban Kunsil Nengeri (ADUN) Kabong Mohd Chee Kadir nengah pengawa ngadu ‘flag off’ pekit Slow Ride Bike Open.
Dalam jaku pengelalu iya, Chee mega bisi ngemeratka pekara bekaul penyerakup ti rat entara pupu raban bansa, bebasaka sereta besaup enggau pangan diri lalu pia mega tikas disiplin maya bebaika mutusikal ba atas jalai alun ti enda ngelanggar undang-undang ke udah ditetapka sereta nyeliahka diri ari bekaul enggau aktiviti ke nadai pengerai bala belumba ti nadai pemendar, gian dadah sereta seruran nyaga pengelikun diri enggau mensia mayuh.
Sama bisi nyempulang Chee iya nya Mandal Presiden Kelab Mutusikal Kabong Bikers Ilaihi Edai, Tukang Wang Kelab Mutusikal Kabong Bikers Badrulhisham Hamsawi sereta Chairman LCCSS Amran Mohd Jam ti sama udah nyuaka perais ngagai pemenang enggau betukar tepa entara kelab mutusikal ke datai ti nyadi kelai pengujung program maya nya.