SIBU: Menteri Opis Kandang Menua enggau Pengawa Berumah,Datuk Dr Sim Kui Hian kemari madahka niang Dato Andrew Wong siku ketuai ti ngembuan juluk ati, lalu nganggap pemidang iya siti pengelenyau besai ke Sarawak.
Niang Andrew ke mega ex- Sapit Chairman Majlis Perbandaran Sibu (MPS), sereta anak tunggal lelaki Menteri Wang Kedua, Dato Sri Wong Soon Koh.
Dr Sim madahka berita pemidang Andrew balat nengenyitka iya. “Laban aku meda iya gerai sereta regas,suah ngaul diri enggau bemacham aktiviti ,” ku iya.
Iya mega madahka siku orang biak ke bisi penau ngaga utai besai.
Dr Sim madah munyi nya ngagai pengarang berita ba rumah Temenggong Dato Vincent Lau Lee Ming lebuh ke ngabang Taun Baru China.
Presiden SUPP nya madah, kepenudi endar iya bejaku enggau Andrew iya nya maya nyauka ujung taun siti nyin tadi. “Kami duai bemesej tau WhatsApp,” ku iya ngenang nya baru.
Dr Sim deka mulaika diri ke Kuching pengudah ngulu pengeami ditu ( 12 Feb).
“Aku deka ke Sibu baru kena 13 Februari laban deka meri basa kepenudi endar ngagai Andrew,” ku iya.
Iya mega meri penyinu ati iya ngagai Dato Sri Wong Soon Koh sebilik.
Andrew, 43, ditemu luput ba pintu bilik tinduk iya urung pukul 9 malam kena Hari Minggu nyin tadilalu ditukuka nadai dua jam udah nya.
Indai iya, Datin Sri Pauline Leong, ngabas ngagai bilik iya pengudah Andrew nadai nyaut lebuh dikangauka iya makai lemai.
Iya lalu tetemuka Andrew gegaring luput. Lutur dikangauka datai nyelamatka iya, tang enda mujur.